KIBLAWAN, Davao del Sur -- Ginasubay na sa kapulisan sa Kiblawan Municipal Police Station ang giingong nananum sa dul-an 15,000 ka mga punoan sa marijuana nga naibot sa awtoridad niadtong Hulyo 24, 2021 didto sa Sitio Semandaag sakop sa Barangay Kimlawis, utlanan sa Barangay Tacub.
Sumala sa report sa 39th Infantry Battalion sa 10th Infantry Division, Philippine Army nga human nila nadawat ang report bahin sa mga punoan sa marijuana, gilayong mihimo og operasyon ang kasundalohan uban sa Philippine National Police (PNP) Drug Enforcement Group, Special Operations Unit 11 ug sa Kiblawan Municipal Police Station.
Misugat sa awtoridad ang tambok kaayo nga mga marijuana sa usa ka gihimong plantation nga dunay sukod mokabat kapin kun kulang 1,600 square meters.
Sumala sa awtoridad nga anaa sa P3 milyones ang kantidad sa nasampit nga mga marijuana.
Tungod niini, dako ang kalipay ni Lieutenant Colonel Geoffrey Carandang, commanding officer sa 39IB, sa malampusong pagkadiskubre sa marijuana plantation.
"What we want to do is send a clear and loud message to anyone doing illegal activities in the area, that we will not take it standing. We will remain pro-active against lawless elements. And together with our PNP counterparts, we are a force to recon with," pamahayag ni Carandang sa press release sa 10th ID pinaagi sa Viber.
Anaa na sa tukmang disposasyon ang nasampit nga mga marijuana, samtang ang awtoridad padayong naghimo og pagpanubay aron mailhan ug masikop ang mga nananum niini. (Jeepy P. Compio)