NALANGKAT sa Jumbo Plastic-Basilan ang otomatikong lingkuranan sa 2021 Chooks-to-Go Pilipinas VisMin Super Cup Mindanao Leg finals, Martes, Hulyo 27, 2021 sa Pagadian City Gym sa Pagadian, Zamboanga del Sur.
Kini human hingpit nilang naharos ang tanang duwa sa elimination round pinaagi sa pagpukan sa Petra Cement Roxas, 85-64.
“We are very happy na nasa Mindanao Finals na kami. ‘Yung mga efforts, sacrifices, ito lumabas na,” matod ni Basilan head coach Jerson Cabiltes.
Sa paghibalik sa nakanselar nga duwa batok sa duha ka teams sa niadtong Hulyo 13 tungod sa dautang panahon nga nakaapekto sa sawog sa gymnasium, hinay nga nakasugod ang Basilan.
Ang duwa gisugdan na diha sa third quarter diin ang Vanguards maoy naglabaw, 40-39.
Apan sa dihang nanginit na sila si Chris Bitoon, Hesed Gabo ug Shaq Taganas, ang Basilan nakapahagsa og 9-0 nga rally nga maoy nagwanang sa dalan alang sa mga Peace Riders, 63-56, sa pagsira sa third quarter.
Gikan niini, wala na gyud molingi pa ang Basinla ug hangtod nga naposte nila ang 15 puntos nga labaw, 4:58 ang nahabilin.
Balansing atake ang gihimo sa Peace Riders diin lima kanila ang mitapos sa duwa nga nag double figures.
Si Jay Collado mipuga og 13 puntos ug pito ka rebounds samtang 13 puntos usab gikan ni Jonathan Uyloan. (JBM)