Balay-Balay, Tubig-Tubig: Gihaylo sa tiya

Dear Atty. Joan,

Maayong adlaw, Atty. Joan. Ako si Patring, 22 anyos, ug nagpuyo ako sa Leyte. Nakahibalo ko aning inyong lindog pinaagi sa inyong Facebook page.

Nagsulat ako kanimo tungod kay ang akong igsuon nga si Boyboy, 15, miadto og Manila niadtong Agusto sa miaging tuig aron magtrabaho.

Napugos siya og larga sa kaulohan bisan pa man nga adunay pandemiya tungod kay akong Mama naaksidente ug nanginahanglan mi og dakong kwarta aron maoperahan siya ug pagpalit sa iyang tambal.

Sa wala pa siya milarga, nangayo mi og tabang sa among tiya nga igsuon ni papa. Mipasalig ang among tiya nga maoy mokuha mismo ni Boyboy diri sa Leyte aron dad-on kini sa silingan niya nga nanginahanglan og katabang sa panimalay sa Manila.

Human sa usa ka buwan sukad sa iyang paglarga, mi-chat nako si Boyboy nga dili na kuno niya kaya niya ang trabaho sa Manila. Igo ra tawon sad ko sa pagahatag og words of encouragement pampadasig kaniya kay gawas na lang nga wa niya gidetalye ang iyang mga suliran, kinahanglan gayod og tabang akong mama.

Si Boyboy maoy kinamanghuran ug siya lang sa lima ka managsuon ang wala pay pamilya. Mao nga siya ang gisaligan nga mutabang sa among mama.

Naoperahan gyod si mama tungod sa mga gipada nga kwarta ni Boyboy. Human sa pag-opera, akong gitawagan si Boyboy aron ipahibalo kaniya ang maayong balita.

Apan nakugang ko sa akong nakita pagvideo call namo. Nidaot si Boyboy ug murag masakiton ang pamorma. Ako siya nga gipangutana kon ngano nagniwang siya. Dugay kaayo nakatubag si Boyboy ug naghilak kini.

Gisaysay dayon niya ang gipangbuhat sa among iyaan kaniya. Wala diay siya gidala ngadto sa silingan sa akong tiya. Wala ako magdahom nga ibugaw diay siya sa akong tiya ngadto sa mga lalake aron gamiton ug pahimuslan ang iyang kabatan-on. Kapila na nga nahilabtan ang iyang kinatawo ug pugos nga pagpabuhat og mga sekswal nga akto.

Wala pa masayod ang akong tiya nga nasayod na kami sa hitabo. Gusto unta namo nga mabalik na ang among igsuon diri kay sakit pamalandungon nga nailad mi sa among iyaan nga gi-abusaran ra ang iyang pag-umangkon. Unsa man ang angay namong buhaton?

Imong magtatampo,

Patring

Dear Patring,

Una sa tanan maayong adlaw usab kanimo diha Patring ug salamat sa imong pagsunod niining lindog.

Mahimo gayod nga mapanubag ang inyong tiya sa iyang gibuhat sa imong igsoon nga si Boyboy pinaagi sa pagpasaka og kasong kalapasan sa Expanded Anti-Trafficking in Persons Act.

Ubos sa maong balaod, ginadili ang mga akto sa pag-recruit, pagdala, pagbalhin, paghatag, o pagdawat sa usa ka tawo pinaagi sa paghaylo, pagpugos, pagpanghadlog, pagsaad, pagbayad og kuwarta, ug pagpangilad aron mapahimuslan ang biktima pinaagi sa sexual exploitation, pugos nga pagpatrabaho, pagbaligya o pagtangtang sa mga body organ, ug uban pang ngil-ad nga mga tinguha.

Tungod kay menor de edad si Boyboy, di na kinahanglan nga mapamatud-an ang mga pamaagi sa trafficking ug igo lang nga mapamatud-an ngadto sa piskaliya ug husgado nga dunay pagdala didto sa kaulohan kang Boyboy aron sekwsal nga ma-abusaran kini. Mahimo sab nga mupasaka og dugang kaso ubos sa Anti-Child Abuse Law ug Anti-Rape Law subay sa imong saysay.

Labing maayo nga mangayo ka og tabang sa kapolisan sa inyong dapit o didto sa lugar kon diin nahimutang ang imong igsuon aron matabangan kamo sa pagrescue sa imong igsuon ug aron makauli na pod kini. Kinahanglan sab nga dunay social worker nga mu-assist sa pag-rescue sa imong igsuon aron mapahiluna kini og tarong ug malikayan ang trauma sa bata.

Kinahanglan sab kamo nga mukonsulta ug abogado aron magiyahan kamo sa matag proseso sa pagsang-at sa kaso ingon man ang pagpagawas sa imong manghod. Kon di igo ang inyong panudlanan, mahimo kamo nga magpatabang sa Public Attorney’s Office (PAO) o mga civil society organizations (CSO) sa inyong dapit nga mutabang sa mga biktima sa trafficking.

Subong pamalandungon nga bisan pa man nga duna nay mga balaod sa pagpanalipod sa mga bata, dili gihapon malikayan ang pagpangabuso sa mga inosente nga bata. Gani, saulogon karong Hulyo 30 ang World Day Against Trafficking (WDAT) agig paghinumdom nga padayon ang atong pakigbatok sa tanang porma sa trafficking.

Daghang salamat Patring sa imong sulat tampo ug hinaot nakahupay ang maong tambag sa naghuot mo karon nga galamhan.

Imong alagad,

Atty. Joan

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph