Daghana bitawng tunto ug way lingaw karong panahuna ug sayon sayunon lang ang pagpagawas ug peking balita sa social media.
Biktima intawon si Cebu City Mayor Edgardo Labella nga, matod pa sa nangutana nako, “Tinuod ba nga namatay si Mayor Labella, sir?’
Fake news na, Ma’am. Akong tubag sa mga nangutana ug nabalaka. Duna say uban nga nagbugalbugal sa kahimtang sa mayor nga naa pa karon na-admit sa ospital.
Bati-a og batasan ug delikado mosumbalik ngadto sa mga nanunglo sa mayor ang ilang giingon nga patay na o kahimatyon na ang Mayor
Si Jepoy Labella, anak sa mayor, ug si City Administrator Floro Casas mipahibawo nga dakong improvement ang health conditions sa mayor sa pneumonia.
AMORES BATOK CHAN
Wa ko makauyon sa terminong gigamit ni Lapu-Lapu City Councilor Rico Amores, “Gubat na kini!”
Ang pasabot diay ni Amores nga gubat nga gi-post sa Facebook page ni Lapu-Lapu City Mayor Junard Chan sa pag- re-organisar sa komitiba ug pagbabag sa mga proyekto sa mayor.
Grabiha ni Amores, ang pobre masakripisyo.