Nagkadaiya ang pagsaway human mohatag si Presidente Rodrigo Roa Duterte (PRRD) sa iyang kataposan nga State of the Nationa Address (Sona). Usa na niini ang pakyas nga mga saad ni PRRD.
Buyno, tinuod pod hinuon nga may mga saad si PRRD nga wala niya matuman. Sama sa gubat sa pangurakot ug sa gubat batok sa ginadiling druga.
Apan, di sab ikalimod nga daghan usab og mga kalamposan si PRRD nga maoy sentro sa iyang litanya kaniadtong Lunes.
Pero sa mga batikos, well, ingon ana gyod na kada Sona, mogawas gyod nang batikos.
Bisan kinsa pay molingkod nga presidente, mogawas gyod gihapon ang batikos. Duna gyod mga tawo nga mao ray bisyo ang pagpanaway.
Mao kana ang ehemplo sa usa ka nasod nga ubos sa demokrasya. Bisan kinsa adunay hunahuna nga mahimo niya isulti o ipadayag.
* * *
Sanglit kataposan na man to nga Sona ni PRRD, makita didto nga gipadayag na niya ang iyang pagdayeg sa iyang mga sakop sa gabinete nga maayo og record sa pagdumala. Tagsa-tagsa kini niyang gihisgotan.
Buot ipasabot, kon wa maapil sa litanya ni PRRD, aw, usa ray rason ana.
Pero bisan kon matawag nga mao na kadto ang “swan song” ni PRRD, duna gihapon akoy nakitang maayo sa maong Sona.
Kadtong nag-plano nga modagan pagka-presidente sa sunod tuig, duna na silay kabasehan sa ilang plataporma de pangagamhanan.
Mahimo nga di na sila magpataka og yawit kay bisan gani si PRRD wala man makahimo niini bisan pa og hangtod karon, taas lang gihapon ang trust ug popularity ratings ni PRRD.
Usa kini ka timailhan nga bisan talitapos na ang termino sa presidente, nagpabilin ang dakong pagsalig sa bagang hut-ong sa katawhan ngadto kaniya.
* * *
Tawo lang si PRRD, dili superman og bisan unsaon pa niya ang iyang paningkamot sa pag-bag-o, duna gihapoy mga babag sa maong plano.
Miangkon si PRRD nga lisod sumpuon ang pangurakot tungod kay sama sa midukot na kini sa sistema sa atong pangagamhanan.
Gani, daghan sa mga negosyante nga moingon nga kanang ilang ihatag nga komisyon kay apil na kana sa business expense. Pangayoon o dili, libre na kana nga ihatag kay mao lagi, business expense.
Gikan sa taas hangtod sa ubos, dunay kalabotan sa pagsumpo sa pangurakot. Mao nang bisag unsaon pag paningkamot nga mawagtang kini, nagkinahanglan kini og matod pa, top to bottom revamp, aron magsugod sa bag-o.
Lisod kini himoon, gawas kon dunay martial law. Pero bisan pa kon dunay martial law, makasulod gihapon ang pangurakot kay ang nagpatuman sa martial law, apil man pod sa sistema.