Daghang “apan” sa kalapad sa gitaho ni Presidente Rodrigo Duterte atol sa iyang ikaunom ug kataposang State of the National Address (Sona) nga gihimo atubangan sa hiniusang plenariyo sa Senado ug Ubos Balay-Balay Baluranan niadtong Lunes sa hapon, Hulyo 26, ug linawas nga nakita sa telebisyon ug nabati sa radyo sa tibuok nasod.
Makasaysayanon ang naasoy nga Sona human niluntad kini og dul-an sa tulo ka oras. Labing taas sa kasaysayan sukad sa 1986 dihang nahibalik ang demokrasya sa nasod. Unang higayon nga limitado ang nanambong sa mga magbabalaud gikan sa duha ka sanga sa kagamhanan tungod sa pagsunod sa protocol sa coronavirus disease 2019 (Covid-19).
Ang Sona naandan nga espisyal nga panagtagbo diin ang manambong mga magbabalaud, labina sa kababayen-an, magsul-ob sa labing gara nga moda sa sinina ug pamustora. Sa Sona niadtong Lunes, ang mga magbabalud makita nga nangandam apan halos dili mailhan sa ilang konstituwente tungod sa mask.
Malangkubon ang pakigpulong sa presidente labi na sa pag-angkon nga naglisod sa iyang gibandera nga gubat batok sa gidiling drugas ug korapasiyon. Gawas nga napagan sa Covid-19, matod niya, ang unom ka tuig nga termino sa presidente dili igo sa hingpit nga pagpuhag.
Hinuon, magarbuhon siya nga nitaho nga intandog ang sindikato sa illegal nga negosyo sa druga ug niminos kini. Wa siya magtuo nga siyam sa mga heneral nalambigit sa sindikato sa druga. Samtang, ang mga kurakot nga opisyal nagpabilin sa posisyon. Beterano na ubos sa nagkalainlaing presidente.
Ang kataposang Sona ni Duterte way kalahian sa ubang kataposang Sona sa nangaging presidente sa nasod. Napakyas sa pagtaho sa tino nga dalan nga gilatid alang sa kalamboan sa ekonomiya nga mogiya sa umaabot nga administrasyon. Bahala na lang? Humana ang iyang termino.