Kapin na sa 80,000 ka mga tawo sa Cebu City ang nakumpleto sa ilang bakuna batok sa coronavirus disease (Covid) -19 gikan sa mga vaccination sites nga gidumala ug gipadagan sa Cebu City Government ug Project Balik Buhay (PBB).
Sa record sa Cebu Vaccination Statistics (CVS) niabot na og 83,643 ka mga indibiduwal ang nakompleto sa ilang second dose.
Sa maong gidaghanon 49,520 ka mga tawo ang nabakunahan gikan sa vaccination sites nga gidumala sa Cebu City Government sukad niadtong buwan sa Marso niining tuiga.
Natala sab sa CVS nga 156,016 nakadawat sa first dose diin ang 114,736 niini nagagikan sa Robinson Galleria, SM Seaside City, NOAH complex, UC Banilad, UC Alcantara, Ayala Center Cebu ug sa mountain barangays.
Si Konsehal Dave Tumulak nipahibawo nga nakabakuna og 5,733 ka indibiduwal niadtong Hulyo 26 nga maoy labing daghan nga nagpabakuna sud sa usa adlaw.
Samtang nanawagan si Konsehal Joel Garganera sa mga Sugbuanon nga likayan ang mga private gatherings sama sa mga okasyon nga tapok-an sa lainlaing mga bisita.
Sa dihang niabot ngadto sa three digits ang Covid cases matag adlaw sukad niadtong Hulyo 17, diin nakatala og 196 ka kaso sa usa ka adlaw.
“Palihog tawon mo-cooperate ta, disiplina ta sa atong tagsa-tagsa ka mga kaugalingon, kaning atong gibuhat karon para rani kanato labi na nga moabot ang Pasko para hamugaway ug kumpleto ang atong pamilya, sakripisyo lang una kita karon,” hangyo sa opisyal. (PAC)