Gidid-an na sa kagamhanan sa Lungsod sa San Fernando nga mogawas ang mga senior citizens kon wala kini mabakunahi kontra Covid-19.
Gidili na sab ang paghaya sa mga mga minatay nga nabugtoan sud sa ospital, samtang kadtong namatay sa balay gitugotan og usa ka adlaw nga bilar.
Kini maoy gipahibaw ni San Fernando Mayor Lakambini “Neneth” Reluya sa Hulyo 27.
“Ang among mga senior citizens only allowed to go beyond their residences if naa sila yung vaccine ID. If wala naa mana sa coverage sa among resolution dili namo sila i-allow na mo-travel sa public places na walay vaccine,” matod ni Reluya.
Gipahibawo sab nga kanselado ang tanang kalihukan sa lungsod apan kon mopahigayon og kalihukan, kinahanglan na nga mokuha og permit sa gikan sa Inter-Agency Task force.
Ang Lungsod sa San Fernando nakatala kini og 31 ka mga aktibong kaso.
Bisan pa niini, giklaro ni Reluya nga walay plano ang lungsod nga mopaubos sa istriktong measures o ang pag-lockdown.
GINATILAN
Sulod sa unom ka adlaw pahugtan ang protocol sa Lungsod sa Ginatilan.
Sa labing uwahing kamandoan nga giluwatan ni Ginatilan Mayor Michael Dean Singco, nga kon mahimo dili magsige og gawas sa balay kon walay importanteng lakaw.
Ang Executive Order No. 4 ni Singco naglatid nga gidili mogawas ang mga batan-on nga nag edad 15 anyos paubos ingon man ang mga senior citizen.
Sugod Hulyo 28, ipatuman na ang mas sayo nga curfew nga magsugod sa 8:00 sa gabii ngadto na sa alas 4:00 sa buntag.
Gawas lang sa mga residente nga nanarbaho ug kadtong nalakip isip essential worker.
Aron malikayan ang tapok-tapok, gimando sa pagsira sa mga karaoke establishments, internet shops, fitness gym, barber shops ug salon.
Lakip usab nga sirad-an ang mga tourism spots, ilabi na kadtong mga camping sites.
Gidili sab ang pagpahigayon og mga kalihukan sama sa birthday parties, kasal, reunion ug uban pa.
Alang sa mga mag-commute limitado ang makasakay sa tricycle ngadto lang sa tulo ka mga pasahero, samtang tagsa lang ang makasakay sa trisikad ug motorsiklo. (ANV)