GIDILI ang pagsuroy sa mga tourist destination sa lungsod sa Borbon, amihanang Sugbo karon nga ipaubos sa mas estriktong paglimit sa paglihok sa mga residente sa lungsod.
Subay sa giluwatan nga kamandoan ni Borbon Mayor Noel Dotillos, lakip sa gidili mao ang pagsuroy-suroy ilabi na kon way kalabotan sa pagpanrabaho o emerhensya.
Si Dotillos miluwat sa Executive Order No. 05 sa Hulyo 28, 2021 nga naglatid sa mga lagda nga angay sundon sa mga konstituente sulod sa siyam ka adlaw sugod Agusto 2-11.
Ang Borbon dunay sikat nga mga tour destination sama sa Silmugi River Park ug Nonoc Cave.
Aron mapugngan ang pagsuroy-suroy sa mga batan-on, i-patuman pag-usab sa lungsod ang curfew nga magsugod sa alas 10:00 sa gabii hangtod sa alsa 5:00 sa buntag.
Dili usab pwede mogawas ang mga residente nga nag edad 15 anyos paubos, kadtong dunay mga gihambin nga sakit ug mga buntis.
Giawhag ang mga residente sa pagpahigayon na lang sa mga kalihukan sa virtual nga paagi sanglit dili na pwede ang pagpahigayon og birthday celebration, kasal, bunyag ug fiesta.
Suspendido usab ang mga physical nga kalihukan sa simbahan ug uban pang mga relihiyosong kalihukan.
Gihimug-atan usab sa kagamhanan nga gidili ang pag paninda, pagpalit ug ang pag-inom og ilimnon nga makahubog.
Sirado usab ang tanan nga mga establisimento nga wala nalakip sa mga essential establishments sama sa mga internet shop, fitness gym, videokehan, mga entertainment establishments ug uban pa.
Subay niini, gimandoan ang kapulisan, force multipliers ilabi na ang mga opisyal sa barangay sa pagsiguro nga matuman sa tanan ang kamandoan.
Ang dili motuman sa kamandoan mag atubang og tukmang silot nga ipahamtang sa kagamhanan. (ANV)