Upat ka mga tawo nga taga Mindanao nga nagdala og high-powered nga mga armas gikan sa Metro Manila na-intercept ug nasikop sa kapulisan ala 1:30 sa hapon sa Miyerkules, Hulyo 28, 2021 sa Balwartheco Port, Barangay Looc, Allen, Northern Samar.
Ang operasyon gipahigayon human ang kapulisan sa lungsod sa Allen nakadawat og intelligence report mga alas 8:30 sa buntag sa Miyerkules nga dunay pribadong mga sakyanan nga gikan sa Taguig, Metro Manila nga gikargahan og high-powered nga mga armas.
Nipahigayon gilayon og operasyon ang Allen Municipal Station kauban ang Northern Samar Police Intelligence Unit, Philippine Coast Guard uban ang ilang K9 Unit, Northern Samar Police Mobile Force Company ug uban pang unit sa kapulisan.
Tuod man, ilang na intercept ang duha ka mga Toyota Vios sedan ug mga sakay.
Ang nadakpan giilang sila si Daud Jumamang Ludungan, 43, minyo, mag-uuma, taga Barangay Madia, Salibo; Roger Daud Baguindali, 33,driver, minyo, taga Barangay Ulingan, Datu Piang; Wahid Esmael Yusop, 23, minyo, driver, taga Barangay Butilen, Ampatuan ug Abdulgapor Buday, Singh, 65, minyo, taga Barangay Andavit, Datu Salibo. Ang mga dapit nahisakop sa lalawigan sa Maguindanao.
Ang upat ka suspetsadong mga gunrunner gitumbok nga suppliers og mga armas sa Bangsamoro Islamic Freedom Fighters (BIFF).
Sa pagsuwat ning taho, gipahigayon pa ang imbentaryo sa mga armas. (JKDP)