MAAYONG adlaw, mga Super Suki! Kumusta mo diha? Okay ra ba ang kinabuhi?
Nakakuha na gyud og medayang bulawan ang atong nasud sa Tokyo Olympics nga gisakmit sa usa ka Mindanaon, gikan sa Zamboanga City, si Hidilyn Diaz.
Garbo natong mga taga Mindanao nga gikan sa yuta sa saad ang atleta nga mihatag og dakong kalipay sa katawhang Pinoy tungod sukad sa 1928, igo ra gyud ta paghandom nga unta makakuha pud ta og gold medal sa maong torneyo.
Usa pa ka Mindanaoan ang padayon nga nakigbisog nga kasamtangan segurado na sa bronze medal sa boxing sa mga babaye.
Labaw sa tanan, atong garbo mga Dabaweño tungod taga Barangay Bago Gallera ang maong atleta, si Nesthy Petecio nga nagsugod sa pagdula sa ring kauban sa Calinan Boxing Team didto sa Cagayan de Oro, diin iyang gipildi ang anak ni Olympian boxer Roberto "Boby" Jalnaiz.
Ang Calinan Amateur Boxing team buhi hangtud karon, kabilin ni kanhi 3rd District Councilor Jose Louie Villafuerte ug kanunay nagarepresenta sa dakbayan sa Davao sa mga amateur boxing competition.
Panahon karon sa mga taga Mindanao sa paghatag og kadungganan sa atong nasud ug panahon nila nga mga kababayehan ug Mindanaoan.
Garbo nato nga kining mga kahimoan, natigayon sab sa panahon nga ang chairman sa Philippine Sports Commission, usa gihapon ka taga Mindanao - si Chairman William "Butch" Ramirez nga taga Davao.
Daghan ang mga kabag-ohan nga atong nakita ubos sa pagdumala sa mga taga Mindanao diha sa kagamhanan.
Ubos sa pagdumala ni President Rodrigo Duterte, unang Mindanaoan nga nahimong pangulo sa nasud, nakita ang dagkong kausaban ug giila ang atong nasud sa Asia ug sa tibuok kalibutan tungod kaniya.
Mayoriya sa katawhan karon sa nasud nagatuo nga usa nga gikan sa Mindanao ang posible nga mosunod nga mahimong pangulo gihapon sa nasud.
Kinsa man kaha? Si Manny Pacquiao ba?
Nagpasibaw na si Pacquiao nga magpapili pagka-presidente sa eleksiyon sa 2022. Paluyohan kaha siya sa katawhan sa Mindanao?
Ang resulta sa survey, didto man pabor ang kadaghanan kang Mayor Sara Duterte Carpio. Didto man makita ang pilo-pilo nga gilay-on sa ilang distansiya kinsay gusto sa katawhan nga sunod nga mangulo sa atong nasud.
Sa nagakasunod-sunod nga mga hitabo ug dagan sa panahon, makaingon kita nga panahon karon sa kababayehan nga mohatag og dungog sa atong nasud ug posible nga mopadayon pa kini ngadto sa unahan kon dili masuhong.
Nagkahinam ang pagpaabot sa katawhan samtang nagkaduol ang pag-file sa certificate of candidacy sa bulan sa Oktubre.
Samtang padayon pa nga nakigbisog ang atong mga atleta sa Tokyo Olympics, atong i-ampo nga unta luwas sila sa disgrasya ug daghan pa nga medalya ang ilang hakuton sa ilang pagpauli dinhi sa atong nasud.