GITULDOKAN karon sa Northern Davao Electric Cooperative nga di mamahimong mabutang sa privatization ang nasampit nga kooperatiba sanglit nakakutay kini sa balaod.
Sa ikatulong episode sa Kulokabildo sa Nordeco Alang sa Lig-ong Panag-uban: 3rd Virtual Press Conference live streamed via Facebook niadtong Hulyo 23, 2021, gibutyag ni Allan L. Laniba, ang presidente sa National Association of General Managers of Electric Cooperatives nga di gayod mamahimo ang giingong gitinguha sa pipila ka mga politiko sa probinsiya sa Davao del Norte ug Davao de Oro nga mabutang sa hisgutanang privatization ang Nordeco gumikan naa kini prangkisa nga mandato sa National Electrification Administration pinaagi sa Presidential Decree (PD) 269.
Una niini, giingong gusto sa pipila ka politiko sa dapit nga ipailawom na ang pagdumala niini sa Davao Light and Power Company (DLPC) gumikan sa giingong mga gisagubang nga problema.
"It will not happen as long as the electric cooperative has the franchise. Davao Light has no franchise for Davao del Norte and Davao de Oro," pintok nga pagpasabot ni Laniba.
Gihangyo sab ni Laniba ang mga politiko labi na sa mga mipabor sa privatization nga basahon ang Section 2 sa PD 269, "If you are a public official, you should read this. The law is harsh, but that’s the law."
Ang usa sab ka guest speaker nga si Edmundo Y. Pacamalan, Jr., ang secretary general sa Empowered Citizens of the Philippines ug NEA Project supervisor alang sa Camiguin Electric Cooperative, Inc. ug Misamis Oriental II Electric Cooperative, Inc., nagpatin-aw sa isyu nga usa kuno ka internal matter ang giatubang karon sa Electric Cooperation nga kinahanglan hisgutan sa matag member-consumer-owners (MCOs).
"The discussion should be confined among MCOs as much as possible and on the issue of ownership, MCO leaders should educate the MCOs for instance on reliability of power supply and other related matters. We need to educate the people about the issues," tipik sa pamulong niini via Zoom.
Tungod sa pagpasabot ni Laniba ug Pacamalan, natin-awan karon ang pipila ka mga politiko sa Davao del Norte ug Davao de Oro labot sa ilang hisgutanan sa kuryente. (Jeepy P. Compio)