MISAKA ang ihap sa mga aktibo ug bag-ong mga kaso sa coronavirus disease (Covid-19) sa Cagayan de Oro.
Anaa na sa 1,517 ang aktibo nga mga kaso ug 135 ang mga natala nga mga bag-ong kaso sa dakbayan.
Sa 135 ka mga bag-ong kaso, 75 niini mga local index cases, 32 ang mga local cases with link, 21 ang mga lokal nga authorized persons outside residence (Apors), upat ang mga Apors with link, usa ang person deprived of liberty (PDL), ug duha ang mga patay.
Miabot sa 12,187 ang kinatibuk-ang ihap sa mga kaso sa Covid-19 sa dakbayan.
Ang Cagayan de Oro adunay 1,517 ka mga active cases, 492 niini na-admit sa Northern Mindanao Medical Center ug uban pang mga ospital sa syudad, ug 1,025 ang mga outpatients.
Nakatala usab og 40 ka mga coronavirus-positive nga mga kaso nga karon naka-recover. Anaa na karon sa 10,133 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 537.