Barrita: Sona, kinahanglan ba?

MATAG bukas sa Kongreso, gipaabot nga ang Presidente sa Pilipinas mo-deliver sa iyang State of the Nation Address (SONA) aron pagtaho sa kahimtang sa nasod, pagpadayag sa mga plano sa gobyerno sa moabot nga tuig ug pagsugyot ngadto sa Kongreso sa mga balaod nga angay pandayon ug ipasar.

Sa laktod, ang SONA usa ka giya ngadto sa katawhan ug sa Kongreso kon asa kita padulong ug unsay atong padulngan.

Seremonyas ba lang ang SONA nga mahimong isalikway lang ug di buhaton sa Presidente? O di ba kaha panahon lang kini aron ang mga senador ug mga kongresista makapasundayag sa ilang labing bag-ong mga barong ngadto sa katawhan nga motan-aw sa live telecast niini?

Ang SONA usa ka constitutional obligation ubos sa Article VII (Executive Department), Section 23, 1987 Constitution, nga nagkanayon, “The President shall address the Congress at the opening of its regular session. He may also appear before it at any other time.”

Makaingon kita nga usa kini ka obligasyon sa Presidente kay ang termino nga gigamit sa Batakang Balaod mao man ang “shall” nga sa ato pa, usa ka mando sa unsay pagabuhaton, di sama sa “may” nga mahimong buhaton o dili buhaton.

Kanus-a man mobukas ang regular nga sesyon sa Kongreso? Way petsa nga gitakda apan ang Article VI (Legislative Department), Section 15, 1987 Constitution, nagkanayon, “The Congress shall convene once every year on the fourth Monday of July for its regular session, unless a different date is fixed by law, and shall continue to be in session for such number of days as it may determine until thirty days before the opening of its next regular session, exclusive of Saturdays, Sundays, and legal holidays. The President may call a special session at any time.”

Si Presidente Rodrigo Duterte mi-deliver sa iyang ika-unom ug kataposang State of the Nation Address (SONA) sa subling pagbukas sa Kongreso niadtong Hulyo 26, 2021. Mao kini ang ikaupat nga Lunes sa buwan sa Hulyo.

Way gitakda nga gidugayon ang SONA. Ang katapusang SONA ni Presidente Duterte milanat og hapit tulo ka oras. Ang iyang SONA sa 2016 milanat og usa ka oras ug 32 minutos.

Ang ikaduha sa 2017, milungtad og duha ka oras, samtang ang ikatulo sa 2018, maoy kinamub-an kay miabot lang og 48 minutos. Ang ika-upat sa 2019, usa ka oras ug 34 minutos ug ang ikalima sa 2020, usa ka oras ug 40 minutos.

Si Presidente Duterte, nga niingon nga hayan modagan siya sa pagkabise presidente, namahayag sa iyang SONA sa 2019, “Sabi ko wala ako.. I-I’m tired. I’m tired and I am... Talagang gusto ko na rin mag resign. Sabi ko I am not happy anymore.”

Pero matod pa ni Henry Kissinger, kanhi National Security Adviser ug Secretary of State sa Estados Unidos, nga karon 98 anyos na, “Power is the ultimate aphrodisiac.” Mao tingali kini ang naghatag sa pangulo og kalagsik. (edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph