BISAN kon padayong nagkaubos ang mga kaso sa coronavirus disease sa Dakbayan sa Sugbo, si Mayor Edgardo Labella niingon nga di kini angay nga ipasigarbo, labina nga naa na sa 86 porsyento ang recovery rate sa mga nangasakit.
Sila si Labella ug ubang dagkong mga opisyal nangaleksyon na dihang mikalit pagsulbong og balik ang mga kaso sa Covid-19 sa dakbayan niadtong Hunyo hangtod sa Hulyo, hinungdan nga ang MalacaƱang nipadala og overseer dinhi.
Bisan si Cebu City Councilor Joel Garganera, deputy deputy chief implementer sa Inter-Agency Task Force (IATF) Emergency Operations Center (EOC) sa Dakbayan sa Sugbo, wa motug-an unsa ning 32 ka mga barangay nga wa nay mga kaso sa Covid. Sa 80 ka mga barangay sa siyudad, upat rang wa masudli.
Nganong wa man kini gisulti ni Garganera? Tungod kay kon makahibawo ang mga lumolupyo, mokompyansa na sab. Mawala ang social distancing, kanunay nga pagsul-ob og face mask ug pagtuman sa uban pang mga protocol kay makaingon man nga wa na bitaw Covid.
Mao nga angay usab sabton nganong bisan pag lugakan ang quarantine status sa Dakbayan sa Sugbo, ipatuman gihapon nga estrikto ang mga health protocol. Bisan gani ang Siyudad hugot nga nagpatuman sa ordinansa nga magsilot sa mga tawo nga way face mask, way quarantine pass, way social distancing ug uban pa.
Gituyo kini aron di magpataka sa paggawas ang si bisan kinsa sa balay. Kay ang gitugtan rang makagawas mao kadtong exempted ug mga trabahante sa mga industriya nga gitugtang makabalik sa pagbukas.
Di angay nga masuko kon higpit gihapon ang kagamhanan sa paglihoklihok sa mga Sugboanon. Di lalim kon mobalik na sab sa sinugdanan kay dako na kaayog kadaut nga nahimo ang Covid-19 sa ekonomiya. Kon naantos ang unom ka mga buwan nga quarantine, lahuson na lang aron segurado nang makabangon ang ekonomiya. Antuson lang gyud una.