SECTIONS
Superbalita Cebu
Tuesday, September 21, 2021
SUPERBALITA CEBU

Editoryal: Antos lang una

Editorial cartoon ni Ariel Itumay

ANG mga esena karon sa ospital susama nga talan-awon dihang ang Dakbayan sa Sugbo bag-o pang naigo sa coronavirus disease 2019 (Covid-19) sa miaging tuig. Naglinya ang mga ambulansya, nangapuno ang mga emergency room ug paspas kaayo ang delivery sa mga oxygen tank.

Ang talan-awon maora og deja vu, kana bang mga hitabo nga susama og imo nang nakita sa miagi.

Makalilisang na ang pagpanakod kay tag 3-digit na sab ang gidaghanon sa ma-Covid kada adlaw sa Dakbayan. Ang nakapabug-at pa sa mga ospital dinhi kay di lang taga Dakbayan sa Sugbo ang gipa-admit, gikan pa sa ubang mga dapit.

Tungod ning uwahing mga kalamboan, ang tri-cities nipatuman og mas hugot nga mga lakang bisan kon ang tibuok Sugbo ubos pa sa modified general community quarantine.

Sakto ang pagpatuman og balik sa liquor ban, pag-irog sa curfew hours ug pagdili sa mga tapok. Mao ni ang posibleng mga tinubdan sa paspas nga pagsaka sa mga kaso karon. Naa na baya ta sa third wave sa pagpanakod, matod sa Department of Health (DOH) 7.

Tag-usa lang ka buwan ang pagpatuman sa pipila ka restrictions nga gipatuman sa mga local government unit (LGU). Obserbahan nila kon duna bay panginahanglan nga kini lugwayan.

Samtang naa pa ang virus ug hinay pa ang rollout sa pagpamakuna, mas maayong ipatuman ang hugot nga restrictions hangtod makab-ot ang herd immunity. Di man tingali dako kaayo ang epekto sa mga negusyo kining restrictions karon. Mas maguba ang ekonomiya kon ibalik kita sa enhanced community quarantine (ECQ). Dili ra ba kini imposible kon magpadayon ang pagsaka sa mga kaso sa Covid.

Kapoy na tuod nga motuman gihapon sa mga protocol nga sobra na sa usa ka tuig nga gitamdan sa kinabag-an. Apan di ba mas kapoy nga magsige na lang og balik sa uno sama sa nahitabo karon? Mas maayo nga moutong, mag-antos lang una. Mahuman ra kining tanan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph