ORMOC CITY -- Upat ka mga tawo nga taga Mindanao nga nagdala og high-powered nga mga armas gikan sa Metro Manila na-intercept ug nasikop sa kapulisan sa Balwartheco Port, Barangay Looc, Allen, Northern Samar, ala 1:30 sa hapon niadtong Miyerkules, Hulyo 28.
Ang operasyon gipahigayon human ang kapulisan sa lungsod sa Allen nakadawat og intelligence report nga dunay pribadong mga sakyanan nga gikan sa Taguig, Metro Manila nga gikargahan og high-powered nga mga armas.
Nipahigayon gilayon og operasyon ang Allen Municipal Station kauban ang Northern Samar Police Intelligence Unit, Philippine Coast Guard uban ang ilang K9 Unit, Northern Samar Police Mobile Force Company ug uban pang unit sa kapulisan.
Positibo human ilang na-intercept ang duha ka mga Toyota Vios sedan ug mga sakay niini.
Ang nadakpan giilang sila si Daud Jumamang Ludungan, 43, minyo, mag-uuma, taga Barangay Madia, Salibo; Roger Daud Baguindali, 33, drayber, minyo, taga Barangay Ulingan, Datu Piang; Wahid Esmael Yusop, 23, minyo, drayber, taga Barangay Butilen, Ampatuan; ug Abdulgapor Buday Singh, 65, minyo, taga Barangay Andavit, Datu Salibo.
Ang dapit sa mga suspek pulos nahisakop sa lalawigan sa Maguindanao.
Ang upat ka suspek giilang mga gunrunner ug gitumbok nga supplier og mga armas sa rebeldeng Bangsamoro Islamic Freedom Fighters (BIFF).
Sa pagsuwat ning taho, gipahigayon pa ang imbentaryo sa mga armas. (JKDP)