ORMOC CITY -- Mga sakop sa kapulisan ug Calbayog City Health Office (CCHO) sa dakbayan sa Calbayog, Samar ang gipabuthan sa gituhoang mga sakop sa New People’s Army (NPA).
Kini nahitabo sa national highway sa Barangay Lale, lungsod sa Pinabacdao, Samar, ala 1:00 sa hapon niadtong Martes, Hulyo 27.
Matod sa kapulisan, padulong ang ilang convoy sa Department of Health (DOH) 8 aron magkuha og bakuna para sa Calbayog.
Sa ilang pag-abot sa maong lugar, tulo ka mga buto sa armas ang ilang nabati ug mga 20 metros gikan sa likod sa patrol car, dunay kusog nga pagbuto.
Si Police Staff Sergeant Vito Jordan dali nga nitawag og back-up gikan sa Pinabacdao Municipal Police Station.
Walay natala nga nakalas ug angol sa insidente pero padayon nga nakaalerto ang mga awtoridad.
Gikondenar ni Police Brigadier General Ronaldo De Jesus ang hitabo sa paghulga sa vaccination team.
Gikan sa pag-abot sa mga bakuna sa Eastern Visayas, kini ang labing unang higayon nga nakasinati og harassment sa mga rebeldeng ang mga awtoridad ug mga tinugyanan sa panglawas. (JKDP)