KAPIN sa usa ka kilo nga shabu nga mobalor og P6,936,000 base sa Dangerous Drugs Board (DDB) value ang nasakmit sa buy-bust sa San Carlos Heights, Barangay Quiot sa dakbayan sa Sugbo diin duha ka mga suspek ang nasikop.
Ang operasyon gihimo sa mga sakop sa City Drug Enforcement Unit (CDEU) ug City Intelligence Unit (CIU) sa pagpangulo ni Police Lt. Col. Randy Caballes sa Cebu City Police Office (CCPO).
Ang mga nadakpan mao silang Ryan Rabanes, 19, taga L. Flores St., Barangay Pasil nga nalakip sa regional level watch list ug Henry Gayhe Bontilao alyas Tikloy, 39, taga Binaliw, bukirang barangay sa dakbayan sa Sugbo.
Matod ni Police Colonel Josefino Ligan, hepe sa CCPO, taudtaod na nga gi-monitor sa iyang mga personnel ang mga suspek.
Atol sa imbestigasyon, nasayran ni Ligan nga gikan sa sa Cebu City Jail ang kontak ni Rabanes nga giila lang nga si alyas ‘Lakang.’
Ang packaging sa mga binulto nga shabu dunay Chinese markings, sumala ni Ligan, nagpasabot nga ang tinubdan sa maong illegal nga drugas susama ra sa ilang nasakmit niadtong miaging buwan sa Barangay Babag.
“Kini nga operation namugna na-materialize, nag-positive tungod sa dugay nga pag-monitor ning mga tawhana. Atong nasuta nga just the same ang ilang sources naa gihapon sa city jail. Hinuon, ang atong ahensya sa city jail nagpadayon man ang information exchange nato sa ilaha,” matod ni Ligan.
Giangkon ni Rabanes nga dugay na siya sa maong matang sa trabaho nga iyang gi banabana nga moabot na sa upat ka tuig.
Siya, matod pa, ang hagbongan sa supply sa illegal nga drugas pinaagi sa mando ni ‘Lakang’ nga naa sa bilanggoan bugti sa P20,000 nga suhol kung mahatod niya ngadto sa kustomer.
Kalapasan sa section 5 ug 11 article 2 sa Republic Act (RA) 9165 ang atubangong kaso sa duha ka mga suspek nga gitanggong na karon. (AYB)