DUHA ka mga lungsod sa lalawigan sa Sugbo mao ang labing ulahi nga ningpakanaug og kamandoan sa pag-estrikto og balik sa protocol batok coronavirus disease 2019 (Covid-19).
MOALBOAL
Si Mayor Paz Rozgoni sa Moalboal nabalaka sa pagsaka sa kaso sa Covid-19 ug pagdagsa sa daghan tawo sa kadalanan hinungdan nga nihimo og lakang sa paghigpit o kontrolar sa lihok sa mga tawo sa publikong dapit aron paglikay sa dugang pagtakod sa virus.
Subay sa giluwatan nga Executive Order No. 26 ni Rozgoni, dunay multa nga P20,000 ngadto sa P50,000 ug posibleng mabilanggo sud sa usa ngadto sa unom ka buwan ang dili motuman sa mga lagda sa lungsod.
“This is very alarming as we have never experienced this number of cases ever since the pandemic started. If this continues, dako ang posibilidad nga ang Moalboal mobalik sa lockdown, God forbid. We cannot afford this to happen. Our resources are very limited, and hospitals are now full,” matod ni Rozgoni sa Facebook page sa Moalboal sa Hulyo 27.
Lakip sa mga ipatuman sa lungsod sugod karon, Hulyo 29, mao ang liquor ban, live band, acoustic band, curfew ug ang pag-limit sa kapasidad sa panagtapok.
Ang curfew sa lungsod magsugod sa alas 10:00 sa gabii hangtod na sa alas 5:00 sa buntag.
Aron maseguro nga matuman ang physical distancing, 50 porsiyento nga kaspasidad lang ang gitugotan nga makasulod sa rastaurants ug dining establishments.
Mahimo usab nga motambong sa misa ug mga relihiyusong kalihukan apan kinahanglan nga 30 porsiyento lang sa kinatibuk-ang kapasidad ang pasudlon.
Sama kaniadto, dili na usab makagawas ang mga batan-on nga nag edad 15 paubos ug ang senior citizens nga nag edad 65 pataas.
Gimandoan usab ang tanan sa pagsul-ob sa mask kon mogawas sa panimalay ingon man pag tuman sa nalatid nga mga lagda sa lungsod aron mapugngan ang pagkuyanap sa Covid-19 sa lungsod.
Subay sa uwahing datos sa lungsod moabot sa 33 ang aktibong kaso niini diin unom ang uwahing nadugang sa mga kaso ug duha usab ang namatay.
“I hope you all understand that this is now our new normal. We have no time to be tired because Covid-19 is still around us, waiting for the right time to infect us when our bodies are weak and vulnerable. Hence, each of us must boost our immune system and keep ourselves healthy para dili gyud kita mataptan sa maong virus,” matod ni Rozgoni.
Giawhag usab sa mayor ang mga konstituwente niini sa pagpalig-on sa immune system pinaagi sa insaktong pahuway, pagkaon ug sustansyado, pag-inom og bitamina ug pag-ehersisyo.
BORBON
Samtang dili una pwede nga magsuroysuroy sa tourist destinations sa lungsod karon nga ipaubos sa mas estriktong pag-limit sa kalihokan sa mga residente sa lungsod.
Subay sa giluwatan nga kamandoan ni Borbon Mayor Noel Dotillos lakip sa gidili mao ang pagsuroysuroy ilabi na kon way kalabotan sa pagpanarbaho o emerhensya.
Si Dotillos miluwat sa Executive Order No. 05 kagahapon, Hulyo 28, nga naglatid sa mga lagda nga angay sundon sa mga konstituwente sulod sa siyam ka adlaw sugod sa Agusto 2 ngadto sa petsa 11.
Aron malikayan ang pagsuroysuroy sa mga batan-on, ipatuman ang curfew sugod sa alas 10:00 sa gabii hangtod sa alsa 5:00 sa buntag.
Dili usab pwede mogawas ang mga residente nga nag-edad 15 paubos, kadtong dunay mga gihambin nga sakit ug mga mabdos.
Giawhag ang mga residente sa pagpahigayon nalang sa mga kalihukan sa virtual nga paagi sanglit dili na pwede ang pagpahigayon og birthday celebration, kasal, bunyag ug piyesta.
Suspendido usab ang mga physical nga kalihukan sa simbahan ug uban pang mga relihiyusong kalihukan.
Gihimug-ayan usab sa kagamhanan nga gidili ang pag paninda, pagpalit ug ang pag-inom og ilimnon nga makahubog.
Sirado usab ang tanan nga mga establisimento nga wala nalakip sa essential establishments sama sa internet shops, fitness gym, videokehan, mga entertainment establishments ug uban pa.
Subay niini, gimandoan ang tanan nga mga sakop sa kapulisan, force multipliers ilabi na ang mga sakop sa barangay sa pagseguro nga matuman sa tanan ang maong kamandoan.
Ang dili motuman sa kamandoan mag-atubang og tukmang silot sa kagamhanan. (ANV)