ASAWA wala makatiwas sa pagkanta-kanta kay gipusil patay sa iyang bana nga gisabaan alas alas 8 sa gabii sa Martes, Hulyo 27, 2021 sa Sitio Tangkungan, Brgy. Sambag 1, dakbayan sa Sugbo.
Si Marlyn Baya, 45, nagtrabaho sa barangay hall, namatay human nakaangkog tulo ka mga samad pinusilan sa tuong kilid sa lawas. Napusasan hinuon sa kapulisan ang bana nga giilang si Galo Baya, 48, alias “Galoy,” kanhi gwardiya.
Nakuha sa kapulisan ang .38 kalibreng paltik revolver nga dunay duha ka mga bala ug upat ka mga kabhang.
Si Major Armando Labora, hepe sa Abellana Police Station 2 sa Cebu City Police (CCPO) nga nahinabi sa Superbalita Cebu nagkanayon nga ang bana dunay deperensiya sa pangisip.
Napungot ang bana kay gisabaan sa iyang asawa nga nagsige og kanta bisan kon lawom na ang kagabhi-on.
Ang anak sa magtiayon nibutyag nga nausab ang ilang amahan human makagawas sa ospital.
Ang iyang amahan na stroke hinungdan nga naoperahan sa ulo sa miaging tuig.
Gumikan niini, magsige og yawyaw ug mag-usab-usab ang batasan. Bisan kon naa sulod sa selda sa Police Station 2, magsige gihapon og yawyaw.
Giyawyaw niini nga iyang gipusil ang iyang asawa.
“Simang kaayo estoryahon, lagyo kaayog panglantaw. Unya kalit nga mohinoktok. Giam-aman lang sa ubang priso,” dugang ni Labora.
Si Labora nibutyag nga si Galo nitug-an nga kaniya nga ang armas iyang naplit niadtong security guard pa siya.
Unya kay bag-uhay lang na-renew ang iyang lisensiya sa pagka-sikyu, nakapalit siyag bala.
Ang suspek nga nahinabi sa mga sakop sa media niangkon sa kremin.
“Ako gipusil! Di na ko kaagwanta sa ako asawa, naa koy sakit sa ulo, wala ko palitig tambal,” dugang ni Galo.
Gisapot siya kay bisan kon gabii na kaayo, magsige gihapon og kanta-kanta.
Dili siya makatulog kay modungan sa sakit sa iyang ulo, samutan sa kasaba sa kanta. (GPL)