SUGOD ugma, Hulyo 30, 2021, manakop na ang kapulisan sa Siyudad sa Sugbo sa molapas sa bag-ong executive order nga giluwatan ni Acting Mayor Michael Rama alang sa curfew hours nga magsugod na sa alas 10 sa gabii hangtod sa alas 4 sa kaadlawon, inay magsugod sa alas 11 sa gabii.
Matod ni Police Colonel Josefino Ligan, hepe sa Cebu City Police Office (CCPO), nga ang gihimo sa mga pulis nga nag roving panahon sa kagabhion karon mao ang pagpahimangno nga ipatuman na ang bag-ong executive order sa Kagamhanan sa siyudad sa Sugbo, dili una manakop.
Matod ni Ligan nga tumong niini aron dili na mobalik ang siyudad sa labing taas nga quarantine level tungod sa pagsaka sa mga kaso sa coranvirus sama sa nahitabo sa milabayng tuig.
Hugot usab nga idili ang pagpalit sa mga ilimnon nga makahubog tungod kay subling gipatuman ang liquor ban sa tibuok dakbayan.
Kadtong mga tawo nga nag suroysuroy sa gawas nga di authorized persons outside residence (APOR) panakpon ug i-turnover sa Prevention, Restoration, Order, Beautification, and Enhancement (PROBE).
Nag-andam na usab ang kapulisan ug Probe og holding areas.
Pasabot ni Ligan nga dili mahimo nga ang Ramos gym lang ang himuon nga nag-inusarang holding area sanglit maghuot unya ang mga tawo nga mangadakpan ug di na masunod ang social distancing.
Gitinguha nila nga adunay holding area sa north, south ug central Cebu City aron ang madakpan sa mga pulis nga duol sa maong mga dapit adto dalhon.
Giawhag sa CCPO ang mga establisemento nga kon moabot na ang alas 9 sa gabii, manirado na aron ang mga kustomer makauli pa sa ilang panimalay sa di pa ang oras sa curfew.
Nakig-alayon usab si Ligan sa Bureau of Fire Protection aron mopatingog sa ilang siren inig alas 9 sa gabii isip warning ug ika duha inig alas 10 na nga nagpasabot curfew na.
Nabalaka si Ligan sa padayong pagsulbong sa mga kaso sa Covid-19 sa siyudad.
Kon dili kini mahatagan sa pagtagad, dako ang higayon nga ibalik ang lockdown.
“Nagka taas gyud. Gani tong Sabado, naabot sa 300 ang positive cases. Sa ginaingon na ni Presidente Rodrigo Duterte, basig dili siya ma kontento sa pag address sa Covid, mag lockdown ta og balik which is sakit na sa atoa kay kitang tanan maapektohan,” matod ni Ligan.
Gihatagan lang og usa ka buwan ang Dakbayan sa Sugbo sa National Inter-Agency Task Force nga kon dili pa moubos ang mga kaso sa Covid adunay kausaban sa quarantine level sa siyudad.
Miawhag usab siya sa mga barangay officials nga manginlabot pinaagi sa pag monitor sa ilang mga residente aron badlongon nga kon panahon na sa curfew, kinahanglan nga wala nay tawo sa gawas sa balay.
Si Cebu City Mayor Michael Rama miawhag sa pubiko sa pagtuman sa curfew.
Kinahanglan nga sabton ang mga pulis sa pagpanakop kay mao kini ang iyang mando aron mominos ang mga kaso sa Covid-19.