Gikaguol ni Lapu-Lapu City Mayor Junard 'Ahong' Chan ang pagkabutang sa Dakbayan sa Lapu-Lapu ubos sa modified enhanced community quarantine (MECQ), ikaduhang labing estrikto nga quarantine classification, gikan sa Agusto 1-15.
Niini, sa iyang Facebook post, iyang giawhag ang mga Oponganon sa pagsunod kanunay sa mga health protocol, sama sa pagsul-ob og facemask ug social distancing.
Matod niya nga duna siyay pagahimuong mga lakang kalabot niini.
" Sa pagkakaron, akong gipanawagan sa tanan nga ipadayon ang pagsul-ob og facemask kung asa man mo molakaw, hugasan ang mga kamot o mogamit og alcohol ug ipatuman ang social distancing. Ipadayon nato ang atong kooperasyon para mag-uban kita nga mapaubos ang atong kaso ug dili na mograbe pa ang sitwasyon. Tabangi kami Mahal nga Birhen sa Regla sa pagbantay sa matag usa kanamo, "matod ni Chan. (GCM)