Gihangyo sa usa ka dakong funeral home sa dakbayan sa Sugbo ang mga tambalanan nga i-improve ang storage facilities aron ang mga patayng lawas nga positibo sa Covid-19 dili mapasa-pasa ug malikayan ang posibleng pagkuyanap sa virus.
Gibutyag sa usa ka manager sa funeral home nga di magpahingalan nga pinakataas ang gidaghanon sa mga minatay nga Covid positive karong buwan sa Hulyo.
Gani dunay uban nga tagtungod nga ilang gibalibaran tungod kay puno na ang ilang freezer nga mosulod og upat ka patayng lawas ug puno na usab ang reservation alang sa tulo ka adlaw.
Dunay uban nga gikan sa nagkadaiyang lungsod sa probinsya sa Sugbo motawag sa ilang funeral home apan mabalibaran tungod kay di na nila madala.
Sigon pa sa manager nga niadtong Enero hangtod Marso niubos ang Covid positive nga minatay og 30 porsyento ug nisaka kini sugod niadtong Mayo hangtod karong buwana.
Ang patayng lawas mamahimong masulod sa freezer sud sa usa hangtod duha ka adlaw.
Ang maong funeral home makacremate og 4-5 ka minatay sa ilang usa ka cremation machine matag adlaw.
Ang pinakabata nga ilang nacremate mao ang usa ka 4 anyos nga bata gikan sa Dakbayan sa Talisay ug 90 anyos ang pinakatiguwang nga Covid positive.
Panghinaot niya sa mga tambalanan nga dili i-release ang minatay nga Covid positive kung wala pay klarong punerarya nga mo cremate aron dili kini mapasa-pasa. (MVE)