IMPRESIBONG kadaugan ang gidalit ni Eumir Marcial alang sa mga nagpaabot sa iyang unang away sa Olympics.
Kini human nga ang 25-anyos nga Zamboangeño mipaundang sa iyang kontra nga si Younes Nemouchi sa Algeria sulod lang sa first round nga maoy naghatod kaniya ngadto sa quarterfinals.
Ang referee napugos sa pag-undang sa away tungod sa dugo nga midagayday gikan sa gisi sa ibabaw'ng bahin sa mata sa Algerian fighter.
Sulod lang sa unang minuto sa opening round, usa ka right hook ang mipakamang ni Nemouchi kinsa daling giiphan sa referee.
Pipila ka gutlo ang nakalabay, sa ikaduhang higayon, gihunong na usab sa referee ang away sa dihang nagkapakong ang duha nga miresulta sa pagka gisi dapit sa tuong kilay niini.
Si Nemouchi maoy hulip sa orihinal unta nga qualifier sa Olympic kinsa ni-backout human kini ma-injured.
Ang decision giprotestahan sa corner ni Nemouchi kinsa nagtuo nga dili kini maki-angayon tungod kay ang headbutt mao man ang hinungdan sa gisi nga maoy nakapaundang sa away.
"Unang-una, masaya syempre sa pagkapanalo. Hindi pa ito ‘yung last fight, marami pang fights na darating," matod ni Marcial.
Niadtong 2018 napildi na usab kini si Nemouchi ni Marcial didto sa Russia.
Ang maong kadaugan naghatag og kamatuoran sa mga hype nga gihimo ngadto ni Marcial kinsa nag-professional boxer ug didto na magbasehan sa Kaulohan ubos sa MP Promotions ni Manny Pacquiao. (JBM)