Bag-ong gisementong dalan sa Kiblawan gikalipay sa molupyo

ARON dali ang komunikasyon ug mas mapanindot pa ang hisgutanan nga turismo sa Kiblawan, dali nga natapos ang pagpasemento sa kalsada paingon sa Pandong Bato ug Pulatana Viewing Deck sa Barangay Waterfall, Kiblawan, Davao del Sur.

Tungod niini, nalipay ang mga residente kay pinaagi sa proyekto di madugay mailhan na ang pipila ka mga maanindot nga tourist destinations sa lungsod sa Kiblawan.

Nasayran nga ang proyekto dunay gialokar nga kinatibuk-ang pundo nga P260 milyon, ang sinugdanan sa katumanan sa pangandoy sa katawhan nga mapalambo ang ilang lugar.

Anaa na sa Phase 3 ang pagpatuman sa maong proyekto diin mokabat na sa P60 milyon ang nagasto, P20 million kada phase o hugna.

Gipangunahan ni Congressional District Officer Irick Agbon ang pag-turnover sa proyekto.

Ang proyekto nahimong posible pinaagi ni Congresswoman Didi Cagas nga nakakuha og pundo gikan sa Department of Tourism diin multi-year ang pamaagi sa pagpatuman diin anam-anam ang pagpatuman niini matag tuig hangtud nga kini mahuman. (JPC/DavSur PIO)