NAHIMONG paborito nga suroyanan ug dining place sa lokal ug langyawng turista ang gi-ila nga restaurant by the sea ang Cosina Organica sa Lungsod sa Alegria, Lalawigan sa Sugbo.
Kini tungod kay dili lang ang lamiang pagkaon ang makapadani sa mga turista kundi apil na ang presko nga hangin ug kahayahay sa lugar tungod kay nahimutang kini sa dagat, dili ra layo sa baybayon.
Taliwala sa pagtumaw sa mga fast-food chains ug ubang kan-anan sa nagkadaiyang bahin sa Probinsya sa Sugbo, nailhan na ang Cosina Organica sa ilang gitanyag nga mga menu o pagkaon nga gamit ang mga sagul nga organically-grown nga utanon ug ubang produkto.
Ang maong establisemento gipanag-iya sa magti-ayong Ireneo ug Irene Legaspina nagdalit og nagkadaiyang putahe diin 75 persento sa ilang ingredients mga organic.
Siguradong makatagbaw sa panglasa niadtong mga health conscious ug siguradong dasok sa sustansiya.
Busog na ang tiyan, busog sab ang pamate kay relaxing ang lugar nga haom niadtong buot mo-unwind sa stress sa trabaho o gikan sa ka-busy sa skedyul.
Perfect sab ang sunset view nga magsilbing backdrop sa mga kustomer sa ilang pagpangaon diha sa veranda.
UNSAY GITANYAG?
Gawas sa ilang best-seller nga chopsuey, vegetable curry, ug chao pat chin, ang Cosina Organica nagtanyag usab og mga sizzling dishes sama sa gambas, squid, sisig, pork ug beef steak, ug mga lutong sinabawan sama sa tinolang isda, pochero ug uban pa.
Sa ilang sinabaw nga menu nagkantidad gikan sa P160 ngadto na sa P345, samtang ang vegetables anaa sa P195.
Sa main course ilabi na sa menu nga karne mokantidad gikan sa P180 ngadto sa P230 nga masawhan sa duha ngadto na sa tulo ka tawo, depende sa appetite.
Di sad angay palabyon sa mga kustomer sa ilang lamian samgyeopsal nga mahimong sawhan sa upat ka tawo nga dili sakit sa bulsa ang presyo.
LIKAY COVID
Gisiguro sab sa management sa maong kan-anan nga pabiling luwas ang mga customers taliwala niining padayong pandemya gumikan sa coronavirus disease (Covid-19).
Ilang gisunod ang gipatuman nga health safety protocols nga gilatid sa Department of Health (DOH).
Tuyo nga gibutangan og handwashing area sa entrada sa kan-anan diin ang matag kustomer nga mosulod gikinahanglan nga maghugas sa kamot ug mopa-ubos sa thermal scanning aron pagsuta sa ilang temperatura sa dili pa mosulod sa maong kan-anan.
Ang Cocina Organica modawat usab og delivery service alang niadtong di gusto mogawas sa balay apan gustong mokaon sa mga mga sud-an nga gibaligya sa maong kan-anan.
Modawat usab sila og catering services.
UBANG INFO
Abli ang maong kan-anan gikan sa 10 a.m. ngadto sa 7 p.m. sa matag adlaw.
Kini nahimutang sa San Roque, Poblacion, Alegria, Cebu duol ra sa municipal hall.
Tawag sa 0917-6372835, (032) 476-7290 alang sa reservation o bookings para sa catering/delivery services.