NAKURAT ko human napatik ang akong lindog sa Biyernes nga adunay mihunghong kanako nga mabungkag ang panaghiusa sa administration party. Nagtuo man gud ko nga gitaga na sa bato ang panag-uban nila ni Acting Mayor Mike Rama, nga maoy mulansar pagka-mayor ug mo-bise si Konsehal Raymond Garcia, human gitawag si Rama ni Presidente Rodrigo Duterte sa Malacañang.
Gitawag man gani nako nga nagmilagro kay nagkasabut na sila si Rama ug si Presidential Assistant for the Visayas Mike Dino. Miapil pa siya og pataas sa kamot sa mga mokandidato sa pagka-kongresista sa north district ingon man sa ubang modagan pagka-konsehal. Nahimo kadto kay dili naman modagan si Mayor Edgardo Labella tungod sa iyang sakit. Apan pagbalik nila ni Rama ug mga kauban dinhi, mikatap dayon ang balita nga wala pa maplantsa ang mga padaganon sa sunod tuig nga piniliay.
Akong nasayran nga anaa nay mga private meetings nga gihimo ang grupo nila ni Sec. Dino ug laing tandem alang sa sunod nga eleksiyon. Mitumaw na ang Joy Daluz for mayor ug Garcia for vice mayor. Kon sila maoy paluhohan ni Dino, unsa man diay kadtong pagpatawag ni Pres. Duterte? Akong gituhoan nga tuyo sa Presidente nga magkahiusa ang partido sa administrasyon aron lig-on kining ibatok sa BO-PK ni kanhi mayor Tomas Osmeña.
Mao kini ang gihimo ni Duterte niadtong miaging eleksiyon mao nga na-bise na lang si Rama kang Labella aron magkahiusa. Ambut og unsaon pagduwa ni Dino ang Presidente niini kay molansar man gyud pagka-mayor si Rama. Murag du’t sa bukog kining panagdumot ni Rama ug Dino. Murag napagan man gani si Garcia sa kasuko ni Rama. Kon masi-ak ang City Hall, akong makita nga si Osmeña maoy modagan mismo pagka-mayor.
Sa pagka-kongresista usab sa north district, dako na kaayo og pagsalig ni Konsehal Niña Mabatid nga siya maoy paluyohan ni Mike Dino. Angay masayran nga si Richard Yap gipalansar sa north district sa miaging election sa iyang classmate nga si Dino. Buhian ba siya ni Dino pabor kang Mabatid?
Human sa meeting niadtong Martes sa Fort San Pedro, adunay laing panagtigom nga ipatawag karong adlawa diin himuon na kuno ang lineup sa eleksiyon sa administrasyon. Ang pangutana, maghiusa ba ang Barug, Kusug, PDP-Laban ug Panaghiusa o mabungkag ba?
***
Giangkon ni Presidente Duterte sa iyang katapusang State of the Nation Address (SONA) niadtong Lunes nga anaa gihapoy grabeng graft and corruption sa nasud. Iya ganing gitambagan ang umaabut nga presidente nga modeklarar og martial law ug ilisdan ang tanang mga empliyado sa gobiyerno aron mawala kuno ang kurapsiyon. Unya nganong naglagot man siya kang Senador Manny Pacquiao sa dihang miingon kini nga grabe ang graft and corruption karon sa nasud? Iya usab nga giangkon nga dili sayon ang pagsumpo sa iligal nga drugas.
Dili malimod nga dunay daghang nahimo si Duterte alang sa atong nasud, apan mahimo man kining ipadayon sa ubang mga pulitiko nga buot magpapili aron mopuli kaniya sa Malacanang. (mannyrabacal1144@gmail.com)