KARON nga napasar na ang P4.5 billion nga supplemental budget, makapaabot na ang mga taga Dakbayan sa Sugbo ug ang kagamhanan nga wa nay utang ug matiwas nag tukod ang maanindot nga tambalanan.
Yes, ang usa sa dakong pahat sa supplemental budget ibayad sa nahabiling utang sa Siyudad sa Sugbo sa loan sa South Road Properties (SRP). Ang laing dakong pahat mao ang gahin alang sa pagtiwas sa 10 ka andana nga Cebu City Medical Center (CCMC).
Makatarunganon man usab nga gamiton ang kita sa pagbaligya sa mga luna sa SRP kon alang kini sa kaayuhan sa mga taga Dakbayan sa Sugbo. Dako kaayo ang pahat sa budget matag tuig nga gastuhon sa Siyudad sa pagbayad.
Tinuod, ubos ang interest sa loan, apan nag-agad man usab kini sa exchange rate sa yen batok sa peso. Magkahuyang ang peso batok sa yen, mas dako ang mabayran sa Siyudad.
Ang gahin alang sa pagbayad, kon wa nay utang ang Siyudad, magamit sa mas gikinahanglang mga proyekto sama sa drainage, health care ug uban pa. Di angay pakatulgon ang kwarta sa banko kay ang Siyudad di man pinansyal nga institusyon. Gikinahanglan nga ang kwarta gastuhon aron mahatag ang batakan nga mga serbisyo.
Nasugdan na pagtukod ang CCMC ug nagsugod na sa pagserbisyo sa mga taga Dakbayan sa Sugbo nga nanginahanglan og medical nga atensyon, labina ning coronavirus pandemic. Di baya lalim kon masakit og Covid, labina kon maospital, kay dako kaayo ang gasto. Sa umaabot nga katuigan nga mahuman na ang CCMC, kon dunay samang sakit nga motumaw, di na maratol ang Siyudad sa pagpangitag kabutangan.
Ang harang dakbayan sa habagatan makabaton na og ospital nga ikapasigarbo haom sa iyang status sa Kabisay-an ug Mindanao. Tambalanan nga di lang mapahimuslan karon, apan sa umaabot pang katuigan ug henerasyon.
Unya mas makatagad na ang Siyudad sa mga panginahanglan sa katawhan kay wa na may utang.