MENOR de edad nagpusil sa ulo kay dili niya madawat nga magbuwag sa iyang hinigugma alas 8 sa buntag sa Miyerkules sa Sitio Puertobello, Barangay Southern Poblacion, Lungsod sa San Francisco, mga isla sa Camotes, Sugbo.
Ang biktima nga 16-anyos (ngan gipapugngan sa kapulisan) namatay sa usa ka samad sa tuong tampihak.
Si Police Corporal Aldred Bonjoc, sa San Francisco Police Station nga nahinabi sa Superbalita Cebu, nagkanayon nga ang 14-anyos nga manghod maoy nakakita sa iyang maguwang nga samdan.
Ang manghod nitug-an nga sayo unta siya nga manglawog sa ilang iro dihang siya naagi sa balay sa ilang igsuong babaye nga way tawo niadtong higayuna dihang nakadungog siya og buto sa pusil. Apan siya nakugang kay sa pagtan-aw niya sa lawak, ang iyang maguwang naglunang sa dugo.
Dunay samad pinusilan sa tuong tampihak gikan sa armas nga .38 kalibreng revolver nga dunay usa ka bala ug usa ka kabhang.
Nasuta sa imbestigasyon sa kapulisan nga sa niaging adlaw, nakasab-an kini sa ilang amahan human nahibaw-an nga dunay relasyon sa ilang close relative. Wala makauyon ang amahan ug gisultihan nga buwagan. (GPL)