GIKOMPIRMAR ni Cebu City Councilor Dave Tumulak nga namatay ang usa ka pasyenteng Covid-19 positive sa ambulansya samtang naghuwat sa tugkaran aron makasulod sa pribadong tambalanan sa Hulyo 24, 2021.
Ang namatay mao ang usa ka 28 anyos nga babayeng call center agent nga hubakon.
Matod ni Tumulak nga ang pasyente gi-isolate sa usa ka hotel kay ang mga tambalanan di pa masudlan tungod sa ka puno sa mga pasyente sa Covid-19 bisan kon siya nakasinati na og grabeng simtomas sa Covid-19.
Dihang ang iyang oxygen saturation nagsugod sa pag-ubos sa 40, gikuha siya sa isolation aron dad-on sa labing duol nga pribadong tambalanan.
Apan ang staff sa tambalanan wa modawat ug wa mo-revive sa pasyente tungod kay puno na sila.
Matod ni Tumulak nga ang biktima gikinahanglan nga i-intubate apan ang medics sa ambulansya wa makahimo niini.
Duna usay usa ka pasyente nga positibo nga lisod ang kahimtang sulod sa ambulansya kansang oxygen saturation niubos ngadto sa 75, nga naghuwat usab nga masulod sa tambalanan.
Makigtagbo si Tumulak sa hospital administrators human niya gitagbo ang ambulance operators.
“Subo kaayo nga palandungon. So, right after sa meeting sa ambulances, makig-meeting sad ko sa atong mga hospitals.”
“Kining mga ingon ani nga sitwasyon, we need their help, kay as much as we can, as much as we want to save lives, duna sad mi limitations,” dugang ni Tumulak.
Matod ni Tumulak nga temporaryo nilang i-recall ang 11 ka mga ambulansya sa mga barangay aron pagtubag sa Covid response sa Emergency Operations Center (EOC).
Ang mga pribadong tambalanan nangapuno na sa mga pasyente sa Covid-19. (MVE)