NAGKADAGHANG lokal nga kagamhanan sa lalawigan sa Sugbo ang mipatuman sa estriko nga protocol batok sa Covid-19.
DAANBANTAYAN
Gidili karon sa lungsod sa Daanbantayan sa pagpahigayon og paugnat-sa-kusog, contact o non-contact sports.
Si Daanbantayan Mayor Sun Shimura niluwatan nga Executive Order (EO) No. 27 niadtong Miyerkules, Hulyo 28, bahin niini.
Paagi kini sa kagamhanan nga mapugngan ang pagkatap sa coronavirus disease 2019 (Covid-19) sa lungsod.
Lakip sa gilimitahan sa 50 porsyento lang nga kapasidad sa motambong mao ang pagpahigayon og birthday parties, bunyag, kasal ug lubong.
Gitugotan ubos lang usab sa 50 porsiyento nga kapasidad sa mga makasulod sa business establishments. Lakip sa maong limitasyon ang transportasyon sa lungsod.
Subay niini, ipatuman na usab ang curfew sa lungsod nga magsugod sa alas 10:00 sa gabii hangtod na sa alas 5:00 sa buntag.
Sa maong mga oras, gidGimandoan ni Shimura ang kapulisan sa pagpatuman sa maong mga lagda lukop 20 ka mga barangay sa lungsod.
“The Municipality of Daanbantayan deemed it necessary to take utmost precautions to mitigate the further spread of Covid-19 thereby promoting the general welfare,” matod ni Shimura pinaagi sa iyang EO.
SAMBOAN
Samtang gilugwayan sa lungsod sa Samboan ang pagpahugot sa tulo ka mga barangay sa lungsod sa Samboan hangtod na sa Agusto 1.
Kini tungod sa padayon nga pagsaka sa mga kaso sa Covid-19 sa lungsod.
Subay sa giluwatan nga kamanodan Executive Order 26 ni Samboan Mayor Emerito Caldero Jr. ipaubos sa lockdown ang Barangay Suba, Poblacion ug San Sebastian samtang dili tugotan nga mogawas sa panimalay ang mga residente sa laing barangay kon walay importanteng lakaw.
Gidili una ang mga sports activities ug non-essential travels.
Ang kapulisan ug force multipliers gitahasan usab sa padayong pag-monitor sa mga residente alang sa hapsay nga pagpatuman niini.
Subay sa uwahing update sa Rural Health Unit moabot sa 55 ang natala nga aktibong kaso niini.
Nanawagan ang kagamhanan sa lungsod sa pagsunod sa tanan nga lagda aron malikayan ang pagtakod sa Covid-19 sa uban.
Dumanjug
Ang lungsod sa Dumanjug nisuspenso sugod karon, Hulyo 30, sa tanan nga mga transaksyon sa munisipyo sa lungsod sa Dumanjug hangtod na sa Agusto 2.
Kini maoy gipahibalosa kagamhanan subay sa nagpadayon nga hulga sa Covid-19.
Ginaagi sa memorandum nga giluwatan ni Dumanjug Mayor Efren Gungun Gica, gimandoan ang publiko nga dili una modangop sa munisipyo tungod ipahigayon pa ang disinfection. (ANV)