KUHAON og balik sa Cebu City Government ang 8 metros nga gilapdon sa dalan Urgello paingon sa Sacred Heart Hospital sa Barangay Sambag 2 nga karon anaa na lang sa 5 metros nga gilapdon gumikan sa encroachment.
Kini ang gipadayag ni Konsehal Jerry Guardo, chairman sa committee on infrastracture, nagkanayon nga nagkasabot na ang mga apektadong indibiduwal kansang estruktura nilapas na sa orihinal nga sukod sa karsada.
Matod ni Guardo nga kuhaan og tag 1.25 metros ang matag habig da karsada aron mahibalik ang karaan nga gilapdon niini aron mahimong sayon na sa mga sakyanan pag-agi labi na ang fire trucks ug ubang rescue vehicles.
Samtang gitug-an usab sa konsehal nga nisugot na ang tag-iya sa pribadong yuta nga agian sa karsada para mag-abot na ang dalan sa Sambag-I ug Sambag 2.
Ang road widening gikatakdang masugdan sa dili pa mahuman ang tuig 2021. (PAC)