KAPIN sa 50 ka mga drug user ug drug pusher sa Barangay Calamba, Siyudad sa Sugbo ang boluntarong ningtahan kagahapon, Hulyo 29, ug mopaubos sa community-based drug rehabilitation program sa City Office for Substance Abuse and Prevention (Cosap) ug Philippine Drug Enforcement Agency (PDEA) 7.
Ang Calamba usa sa labing apektadong barangay sa siyudad sa illegal nga druga diin daghan na sa mga drug pusher sa maong dapit ang nadakpan ug ang uban nagpadayon sa ilang illegal nga negosyo.
Isip kabahin sa proseso, gipaubos silang tanan sa profiling ug drug test, kini pagseguro kung kinsa kanila ang nagpadayon sa paggamit sa illegal nga drugas.
Gipahibalo ni Leia Alcantara, ang information officer sa PDEA 7, nga sa 65 nga napaubos sa drug test 43 niini ang nigawas nga nagpositibo sa paggamit og shabu.
Matod ni Police Colonel Josefino Ligan, hepe sa Cebu City Police Office (CCPD), kadtong nagpositibo sa drug test ipaubos sila sa counseling ug kung sa sunod nga session sa ilang seminar magpositibo gihapon sila sa paggamit sa illegal nga drugas, irekomendar na sila nga ipadala sa rehabilitation center sa Lungsod sa Argao.
Si Jonah John Rodriguez, ang pangulo sa Cosap, nagkanayon nga aduna na silay mga pangalan sa maong drug personalities diin ang ilang gihimo mao ang home visit gahapon sa buntag.
Human sa home visit, gidala na dayon sila sa gym sa barangay aron ipaubos sa proseso sama sama sa drug test.
Sa kapin 60 nga ningtahan, upat niini menor de edad ug ang labing bata nagpangidaron og 14 nga miangkon nga taudtaod na siya nga tiggamitan sa illegal nga druga.
Apan sa wala pa sugdi ang programa pagka kaadlawon niini mihimo og dungan nga operation ang PDEA 7 ug ang CCPO pinaagi sa search warrant nga giluwatan sa korte batok napulo ka drug personalities apan siyam lang ang ilang nadakpan.
Matod ni Ligan nga moabot ngadto sa kapin P2 milyones ang ilang nasakmit sa maong dungan nga pagpangranda.
Nagpasabot kini nga daghan pa nga mga tawo sa maong barangay nga nalambigit sa illegal nga kalihukan.
Si Calamba Barangay Kapitan Victor Quijano nagkanayon nga dako pa gihapon kaayo ang problema sa illegal nga drugas sa iyang barangay.
Gani sa ilang listahan sa barangay, aduna nay 157 ka drug personalities ang nakasulod na sa Cebu City Jail tungod sa pagpamaligya sa druga. (AYB)