SI PRESIDENTE Rodrigo Duterte niaprobar sa rekomendasyon sa Inter-Agency Task Force (IATF) for the Management of Emerging Infectious Diseases sa pagpailawom sa mga Siyudad sa Lapu-Lapu ug Mandaue sa pagpailawom sa modified enhanced community quarantine (MECQ) gikan sa Agusto 1 ngadto sa Agusto 15, 2021.
Ang Cebu City ug Lalawigan sa Sugbo magpabilin ubos sa modified general community quarantine (MGCQ) bisan sa nagsaka nga mga kaso sa coronavirus disease 2019 (Covid-19) ug mga taho nga pipila sa mga tambalanan nangapuno na sa mga pasyente sa Covid-19.
Nangasagmuyo ug nakugang sila si Mandaue City Mayor Jonas Cortes ug Lapu-Lapu City Mayor Jonas Cortes sa hukom.
Dali hinuon kaayong nakaapelar ang duha ka mga mayor.
MANDAUE
Sa iyang suwat nga gipadangat ngadto sa NIATF nga gipetsahan og Hulyo 28, 2021, si Cortes nipadayag sa iyang katingala sa rekomendasyon nga unta ang Dakbayan sa Mandaue ubos pa og mga kaso sa Covid-19.
Sa iyang pagsuwat, ang mga kaso sa siyudad naa lang sa 732, wa kaabot sa 50 porsyento kon itandi sa gidaghanon sa mga kaso sa Marso ning tuiga, diin naa gihapon ang siyudad ubos sa modified general community quarantine (MGCQ).
“The question now begs why Mandaue City, which currently has 732 active cases, is now being recommended to be promoted to two steps higher of a quarantine level when the current active cases is short of 50% compared to the total daily cases for the month of March 2021, not to mention that the City currently has the lowest number of active cases in the entire Central Visayas, excluding Siquijor,” matod ni Cortes sa iyang suwat.
Gawas pa niini, ang Siyudad nagpatuman na og hugot nga mga lakang aron kapugngan pa ang pagsaka sa inadlaw nga mga kaso, sama sa liquor ban, pagpasayo sa curfew hours ug pag limit sa mga tapok.
“Aside from this, the 3 HUCs (highly urbanized cities) have unified their community responses against the rising cases to help mitigate the spread of the virus in the next three weeks,” pagpasabot sa mayor.
Iya usab nga gitumbok ang kamahinungdanon sa Dakbayan sa Mandaue sa patigayon sa Sugbo kay agianan kini.
“Mandaue lies within the immediate borders of Cebu City and Lapu-Lapu City and the Province of Cebu, it is the heart of Cebu Island where all commerce and workers pass/traverse through,” dugang niya.
Matod sa mayor nga di lang ang Sugbo ang maapektuhan ning ilang bag-ong quarantine classification, ang tibuok rehiyon usab.
LAPU-LAPU
Si Chan, sa iyang bahin nakapadala gilayon sa alas 5 sa hapon sa Hulyo 28 sa iyang appeal nga maoy deadline sa pagsumiter niini. Gibutyag ni Chan nga nakahibawo na sila daan sa wala pa ianunsyo ang quarantine qualification sayo sa tungang gabie sa Hulyo 29.
Gihimong basehanan ni Chan sa iyang apelasyon nga ang dakbayan di maoy adunay labing daghang mga kaso sa Covid-19 sa pagkakaron sa Sugbo.
Aduna lang silay 1,021 ka aktibong mga kaso. Mas ubos kini sa Dakbayan sa Sugbo ug Probinsya sa Sugbo nga adunay 2,290 ug 2,078 nga aktibong kaso.
Alang sa mayor, di usab mahimo nga lahi ang quarantine qualification sa dakbayan sa silingang mga lugar sanglit usa ra usa ra ang Sugbo.
Apektado unya niini ang katawhan sa ilang pagbiyahe ug paglakaw lakaw hilabi ang mga trabahante sanglit dili sila makalihok-lihok ug dili moagi sa dakbayan ug silingang dakbayan.
Ubos sa MECQ adunay mga establisemento nga did-an maka-operate busa kuyaw og mamatay na usab pagbalik ang nagsangkiig na daan nga ekonomiya, sumala sa ni Chan.
Mas mabutang usab sa kalisod ang katawhan ug labawng wa nay pundo ang kagamhanan alang sa laing estriktong quarantine qualification.
Laing gibasehan ni Chan mao ang subsob karon mga mass vaccination sa dakbayan diin sa milabayng tulo lang ka adlaw, moabot sa 16,501 ka mga indibidwal ang nabakunahan.
Sa kinatibuk-an moabot na sa kapin 65,000 ka mga Oponganon ang nabakunahan kun 20 porsyento sa populasyon.
Giangkon hinuon ni Chan nga puno-puno ang mga tambalanan sa dakbayan, apan siya nipasalig ga mahimong makapalapad sa ilang bed capacity ang mga tambalanan kon adunay idugang nga personnel ang kagamhanan nga gipasalig ni Chan nga iyang ihatag pinaagi sa pag-hire og dugang mga nurse. (REV, GCM, MVI sa Sunstar Philippines)