32 ka Delta variant naa sa Cebu

SunStar File
SunStar File

MOABOT sa 32 ka mga kaso sa Delta variant sa coronavirus disease (Covid-19) natala sa Sugbo. Apan gituohan nga pulos naka recover ang mga pasyente nga nakuhaan og samples.

Kini maoy gikompirmar ni Department of Health (DOH) Regional Director Dr. Jaime Bernadas atol sa pakighinabi sa mga tigbalita sa Hulyo 29 human sa hiniusang tigom sa mga local chief executive sa lalawigan.

Sa maong mga kaso, 19 gikan sa Dakbayan sa Lapu-Lapu, unom sa Dakbayan sa Sugbo, tulo sa Dakbayan sa Mandaue, tag duha sa lungsod sa Samboan ug Cordova.

Giklaro ni Bernadas nga ang maong mga kaso gituohang naka-recover na, apan padayon pa niya kini nga gipasusi.

“Wala na karon. Kon imo nang huna-hunaon, gikuha na July 4-10 man na gi swab. So wala nana sila karon, na contain nana sa ilang mga munisipyo and pwedeng recovered na kay unsa na (July) 29 na karon. So, that’s 15 days after na. But supposedly, recovered nana but ako ning gi-traced back na kay aron mahibaw-an na tanan kinsay nahospital, kinsay mga paryente nga na apektahan na sad,” matod ni Bernadas sa interbyu sa mga tigbalita sa Huwebes, Hulyo 29.

Angay magmabinantayon, apan di angay matarantar kay na-contain na ang mga pasyente human na-isolate.

“Angay ta magbantay, pero ayaw lang mo katarantar. Ato na man na silang na contain. Ato na man nang na-isolate na gikan niadtong pag sublit nato sa ilang swab. So, we assume nga kana sila naka recover na ug kung nahospital man gani na, contain na sila so atong gipa-trace ang circumstances,” matod ni Bernadas.

Tungod niini, giawhag niya ang publiko sa pagpabakuna kontra Covid-19 aron ma protehian batok sa bag-ong variant.

Andam na

Bisan sa wala pa madiskobrihe ang Delta variant sa Covid-19, ang Cebu City government nangandam nang daan sa posibleng pag-abot niini gumikan sa pagdagsa sa mga kaso.

Si Konsehal Joel Garganera, deputy chief implementer sa Emergency Operations Center (EOC), niingon nga gawas sa pasilidad, ang Cebu City andam mogasto og salapi para madugangan ang manpower sa frontline health workers.

Kini sama sa padayon nga pag-hire sa 200 ka job order nga nurses nga maoy moserbisyo sa Cebu City Medical Center ug mga pribadong tambalanan ug subli nga paghatag sa City Hall og tag P10,000 matag buwan sulod tulo ka buwan ngadto sa 350 ka nurse sa private hospitals.

Gidugangan sab nila ang mga isolation centers ug padayon nga nagserbisyo ang Cebu City Quarantine Centers ug ang mga hotels nga modawat og Covid-19 positives.

Sa unom ka mga Delta variant nga naa sa Cebu City, giawhag ni Garganera nga dili mag-panic ang mga tawo apan dili mokumpyansa sama sa pagsul-ob kanunay sa mask ug likayan ang tapoktapok ug private party sanglit dili matag-an ang giimbitar nga bisita adunay virus.

Dugang sa deputy chief implementer nga bisan kon MGCQ ang Dakbayan, apan wa mokumpyansa, diin gidili sa Archdiocese ang mga kalihukan sa kapilya sama sa selebrasyon sa fiesta, bilar sa namatay nga gilimitan og tulo ka adlaw ug ang pagpatuman sa curfew ug liquor ban.

Ang konsehal niingon nga dili angay mahadlok sa maong variant basta gihimo lang ang pagsunod sa mga minimum health protocol.

GIBAKWI

Gibakwi na sa lungsod sa Samboan ug ubang local government units ang pagpatuman sa mas estriktong restriction sa ilang mga lungsod bisan sa pagsaka sa mga kaso sa Covid-19.

Kini maoy gipahibawo ni Cebu Governor Gwendolyn Garcia human sa tigom kauban ang local chief executives sa lalawigan sa Sugbo.

Ilang nasabutan ang pagpatuman sa hiniusa nga protocol sa tanang lokal nga kagamhanan.

Matod ni Garcia nga nisanong ang tanan nga dili na mopatuman og lockdown sa lalawigan samtang i-manage og tarong.

“Akong gihangyo nga let’s speak with one voice, one direction, one action. Ug ma-garbled ang voices, it sends the wrong signal to IATF,” matod ni Garcia sa Hulyo 29.

Nipatuman ang Lungsod sa Samboan pagpahugot sa quarantine tungod sa pagsaka sa mga kaso sa Covid-19.

Lakip usab sa mga lungsod nga nipatuman sa estriktong lagda mao ang Santander, Daanbantayan, Balamban, Borbon, Moalboal, Liloan, Ginatilan ug Dumanjug.

Atol sa pakighinabi sa mga tigbalita, gi himugatan ni Garcia nga subay sa niaging resolution sa IATF nalatid nga dili mahimo nga mopatuman og lockdown ang mga LCEs kon way pagtugot sa Regional IATF.

Kini subay sa probisyon ubos sa IATF-MEID Resolution No. 29 S. 2020 nga giluwatan sa Abril 27, 2020.

Sa Hunyo 15, miluwat og memorandum si Garcia sa tanan nga mga LCEs may labot sa naasoyng resolution.

“A lockdown is ECQ. You cannot declare a lockdown. You can implement a granular lockdown but not the entire LGU. That authority is with the governor,” matod ni Garcia.

Tungod niini, makigtagbo pag-usab si Garcia sa mga mayor sa tri-cities (Cebu City, Mandaue City ug Lapu-Lapu City) sa sunod semana aron hisgutan ang joint position isip One Cebu island.

Kini aron mahiusa ang mga lakang nga himuon aron pagpugong sa pagsaka sa mga kaso sa Covid-19 cases.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph