ANAA na sa 12,475 ang kinatibuk-ang ihap sa mga kaso sa coronavirus disease (Covid-19) sa Cagayan de Oro human nakatala kini og 134 ka mga kaso, pulos mga local transmissions.
Sumala sa report sa City Health Office, sa 134 ka mga bag-ong lokal nga mga kaso, 68 ang mga local index nga mga kaso, 24 ang mga close contacts sa mga pasyenteng nagpositibo sa coronavirus, 25 ang mga local authorized persons outside residence (Apors), tulo ang mga Apors with link, siyam ang mga persons deprived of liberty (PDLs), ug lima ang mga patay.
Misaka ang ihap sa mga aktibo nga kaso sa Cagayan de Oro, aduna nay 1,657 ka mga kaso.
Sa maong numero, 516 niini na-admit sa Northern Mindanao Medical Center ug uban pang mga ospital sa syudad, ug 1,141 ang mga outpatients.
Nakatala usab og 59 ka mga Covid-positive nga mga kaso nga karon naka-recover. Anaa na karon sa 10,273 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 545.