LAPAD nga checkpoint ang ipamutang sa kapulisan sa siyudad sa Sugbo sugod sa alas 10 gabii Hulyo 30, 2021 nunot sa bag-ong giluwatan nga executive order ni Acting Cebu City Mayor Michael Rama tungod sa pagsaka sa Covid-19 sa siyudad ug ang pagsulod sa Delta variant.
Ang bag-ong EO nagpasayo sa curfew hours gikan sa alas 11 ngadto na sa alas 10 sa gabii hangtod alas 4 sa buntag.
Gitumong kini aron di makapatuyang og sulbong ang mga kaso sa coronavirus disease 2019 (Covid-19) sa dakbayan.
Kagabii sa Biyernes, Hulyo 30, gisugdan ang pagpahigayon og checkpoint.
Matod ni Police Colonel Josefino Ligan, hepe sa Cebu City Police Office (CCPO) nga ang tanang mga sakyanan ilang susihon aron masuta kon nasunod ba ang health protocol o authorized person outside residence (APOR) ba ang nanggawas.
Gipanglantawan nga makasinati og kahuot sa dagan sa tra-piko ang siyudad tungod kay tanang sakyanan man ang pahunongon aron masusi ang sakay niini.
“Kon makasugat mog traffic, pasensyahi ninyo kay tungod man kay nag estrikto gyud ta. So, i-expect ninyo na gabiing dako. Anyway wala naman sad nay trabaho,” matod ni Ligan.
Lakip sa manggawas unya ang mga sakop sa Prevention, Restoration, Order, Beautification and Enhancement (Probe) team dala ang bus diin kadtong madakpan diretso nga isakay aron dalhon sa mga holding area.
Gipasalig ni Ligan nga matuman gihapon ang social distancing kon ikarga na sila sa bus.
Giawhag ni Ligan ang mga motorista og mga nagmaneho sa sakyanan nga andamon lang nila ang mga dokumento sama sa certificate of employment (COE) ug lisensya aron di sila malangay sa pagpahunong kanila.
Ang maong lakang gisuportahan sa presidente sa Association of Barangay Council (ABC) Konsehal Franklyn Ong.
Matod ni Ong nga siya mismo ang mangulo sa pag roving sa iyang barangay aron mosulod na sa ilang tagsa-tagsa ka panimay ang mga lumolupyo.
Alang niya, maayo kini nga lakang nga gihimo sa kapulisan ilabi na nga nagkasaka ang mga kaso sa Covid ug sa Delta variant nga gikahadlokan tungod kay dali nga mokatap sa mga tawo.
Awhag niya sa publiko nga maghiusa tali sa gobiyerno sa pagbatok sa makamatay nga virus ug sundon ang health ug safety protocol alang sa kaluwasan sa tanan.
“Importante ni nga maong mga lakang hilabi na nga nagsaka ang kaso sa Covid-19 sa atong dakbayan ug anaa na ang presensiya sa Delta variant. Dili ni tiaw ang atong giatubang nga hulga mao nga gikinahanglan nga magkahiusa ang gobiyerno ug katawhan,” matod ni Franklyn Ong.