ANG Dakbayan sa Sugbo ug Probinsya sa Sugbo ipaubos sa modified enhanced community quarantine (MECQ) sugod sa Agusto 1 ngadto sa Agusto 15, 2021, pahibawo sa Malacañang sa Biyernes, Hulyo 30, 2021.
Kini tungod sa padayong pagsaka sa mga kaso sa coronavirus disease 2019 (Covid-19).
“Masakit na desisyon po natin ‘to dahil alam natin mahirap ang ECQ pero kinakailangan gawin po to para maiwasan ‘yung kakulangan ng ating mga ICU beds at iba pang hospital requirements kung lolobo po talaga ang kaso dahil sa Delta variant,” matod ni Presidential Spokesperson Harry Roque Jr.
Ang quarantine classification sa Cebu City ug Cebu Province mahimo pang iapelar.
Unang gipahibawo niadtong Huwebes, Hulyo 29, 2021 nga ubos usab sa MECQ ang mga Dakbayan sa Mandaue ug Lapu-Lapu.
Way lockdown
Apan bisan nga ang Dakbayan sa Sugbo ubos sa MECQ, unang nahukman ni Cebu City Mayor Michael Rama nga walay lockdown.
Magpabiling bukas ang mga business establishment, padayon ang vaccination rollout ug pabilin nga magbiyahe ang public transport sa Dakbayan sa Sugbo.
“We do not want to close our economy. If it’s going to be closed, is national government, is IATF willing to give us the money?” padayag ni Rama.
Si Rama kinsa nakighimamat kang Governor Gwendolyn Garcia ug nakahinabi kang Mayor Jonas Cortes sa Mandaue City ug Mayor Junard Chan sa Lapu-Lapu City, niingon nga mopatuman og hiniusang polisiya ang tibuok Cebu sanglit usa ra kini ka isla.
“The initial was we agreed on one Cebu island policy which is one voice... If we follow one island, no need to close our borders,” dugang sa acting mayor
Si Rama niingon nga dili siya moapilar sa bag-ong quarantine status sa Cebu City gikan sa modified general community quarantine (MGCQ) ngadto na sa MECQ.
Si Rama niingon nga moisyu siya og parental supervised household lockdown sa mosunod nga adlaw para ang ginikanan na sa matag pinuy-anan ang moimplementar ngadto sa sakop sa ilang pamilya.
Gipadayag ni Rama nga dili na manghatag og ayuda ang City Hall nga maoy gibuhat kaniadto dihang gipaubos sa enhanced community quarantine (ECQ) ang dakbayan.
“We have to stop the so called doleouts. We must emphasize and encourage self-reliance, self-determination and we have to do it ourselves,” batbat ni Rama.
Agi og preparasyon, si Rama nimando sa pagpadali sa paghuman sa ikaduha ug ikatulong andana sa CCMC aron magamit na isip ospital.
Paspasan ang pag-hire og nurses nga maoy gikinahanglan niining panahon sa pandemya aron maoy moatiman sa mga nasakit sa Covid-19, pagpadali sa isolation center sa Abellana National School ug uban pa.
Sa kasamtangan, ang Cebu City adunay 2,527 ka aktibong mga kaso samtang niabot na og 911 ang nangamatay gikan sa 29,428 ka mga tawong nataptan sa maong virus.
Bakuna
Gipahibawo usab ni Rama nga magpadayon ang mga pagpamakuna.
Ipakita lang ang vaccination cards ug confirmation sa schedule sa pagbakuna.
Mao usab kini ang buhaton sa Dakbayan sa Mandaue sumala sa pahibawo ni Mayor Jonas Cortes atol sa iyang press conference sa Hulyo 30, 2021.
Bisan paman nga limitado na ang kalihokan sa mga tawo, matod ni Cortes nga magpadayon ang pagpamakuna batok sa Covid-19.
Matod niya nga ang buot nga magpabakuna mopakita lang sa ilang nadawat nga text message gikan sa Mandaue City Vaccination Operations Center (MVOC) nga sila nakaiskedyul nga magpabakuna ug dad-on ang vaccination card sa nabakunahan na sa first dose.
Ang tanang vaccination sites sama sa Mandaue City Cultural and Sports Complex, University of Cebu Lapu-Lapu Mandaue (UCLM), Parkmall, Pacific Mall, ug JCentre Mall magpadayon sa ilang operasyon, sigon ni Cortes.
Sunod semana, matod ni Cortes nga ilunsad na sa dakbayan ang mobile vaccination clinic kauban sa Philippine Red Cross (PRC) Cebu Chapter aron mapakusog ang pagpamakuna sa dakbayan.
Giasoy ni Cortes nga ang mobile vaccination clinic mobakuna sa A2 (senior citizen), A3 (person with comorbidity), ug A5 (indigent) sub-category group.
Transportasyon
Sa laing bahin, kung ipatuman na ang MECQ, matod ni Cortes nga ang pampublikong transportasyon mao ang usa sa mga gikabalak-an sa iyang konstituwente labi na sa mga trabahante.
Matod niya nga kon way gitugotan nga pampublikong transportasyon nga makabiyahe, ang lokal nga kagamhanan buot ra nga mohatag og libreng sakay nga mga bus sama sa miaging tuig, apan prayoridad gihapon niini ang mga frontline workers.
Apan, ang Land Transportation Franchising and Regulatory Board (LTFRB) nipasalig nga duna gihapoy pampublikong transportasyon alang sa mga essential workers.
Matod ni Eduardo Montealto, Jr., LTFRB 7 director, nga motukma unya sa gidaghanon sa mga pasahero ang gidaghanon sa mga pampublikong transportasyon nga padaganon unya ubos sa MECQ.
“The equation would be the passenger demand. Basin mabawasan kung gamay ra ang mga pasahero,” segun ni Montealto sa usa ka text message sa SunStar Cebu, Biyernes, Hulyo 30.
Matud niya, suspendido ang mga pampublikong transportasyon ubos sa bisan unsa nga community quarantine status. Apan pwede maka operate ang usa ka public transportation unit kon adunay special permit gikan sa LTFRB. (PAC, WBS, KFD, GCM, SunStar Philippines)