Daghang mga fans sa Los Angeles Lakers ang nakauyon ug mipakpak ning pagtapon ni Russel Westbrook ngadto sa ilang paboritong team kay tiaw mo bay madugangan og dakong puwersa ang panagpares nila ni LeBron James ug Anthony Davis.
Napa-champion man gani nila ang Lakers ubos sa liderato nilang duha unsa pa kaha og tulo na sila uban sa laing inilang star player.
Tinuod mahimong hulga sa ubang teams kining maong kalambuan pero sa samang higayon nagtangag kinig dakong pangutana kon haom ba sa panginahanglan sa Lakers si Westbrook.
Kon atong lantawon ang stats ug achievement ni Westbrook, way kuwestiyon impresibo gyud kaayo ilabi na kay siya karon ang aktibong naghupot sa triple-double nga record sa NBA.
Pero basi sa atong obserbasyon, ang gikinahanglan sa Lakers mao man ang mga outside shooters, butang nga wala sa kalidad ni Westbrook.
Ang style ni Westbrook kinsa maoy 2016-17 most valuable player (MVP) awardee, way kalahian sa kang LeBron James.
Dili siya hulga sa three-point area ug ang iyang shot selection maingon nato nga puwersado kaayo kay kini buhaton niya bisan atubangan sa hugot nga depensa. Mao usab kini kang James.
Gawas nga ubos kaayo ang iyang porsiyento sa three-point land, dili usab siya consistent sa iyang depensa.
Si Davis notorious sa iyang mga inside plays tungod sa iyang gitas-on ug hatay nga lawas. Ilawom ang iyang duwa.
Kon imong dunganon og pasulod ning tulo, ang tanan unyang duwa sa Lakers pulos anaa na sa shade area - butang nga makapakyu-ot sa ilang space offensively. Kini maoy makahatag unya og kasayon sa depensa sa ilang kontra.
Sa laktod nga pagkasulti, ang presensiya ni Westbrook usa lang ka redundant sa team, kana bang naghatag lang og komplikado ug wa unta kinahanglana.
Ang pagkawagtang nila ni Kyle Kuzma ug Kontavious Caldwell-Pope kinsa kabahin sa binayloay bugti ni Westbrook naghatag og dakong haw-ang sa ilang outside shooting. Kining duha pulos taas og percentage sa three-point territory nga sa gikaingon na nato maoy kuwang sa Lakers.
Si Westbrook edaran na sab, mahal og presyo ($43 million karong tuiga ug mousbaw pa kini sa sunod tuig) nga makaapekto sa ilang salary cap.
Sa kasamtangan, lima lang ang holdovers sa team: James, Davis, Marc Gasol ug kini ilang bangko nga si Alfonzo McKinnie kinsa undrafted niadtong 2015.
Kon mo-click ba ang James-Davis-Westbrook combination sa Lakers, it remains to be seen pa, kay nagpadayon pa ang ilang pagpanghashas og players aron makompleto ang ilang lineup.
Di pa gyud ni nato matino kon unsa kini ka epektibo, pero ang klaro sa pagkakaron mao nga ang nakapabor og dako sa maong trade way lain kon dili si Westbrook. Maayong pagkahiluna ilabi na kay lumad siya nga taga Los Angeles.
Dunay mga taho nga nagpadayon ang negusasyon karon nga mabira usab sa Lakers ang guard sa Sacramento Kings nga si Buddy Hield ug matod pa sa taho nga agresibo usab ang Kings sa tanyag sa Lakers.
Kini si Hield naila usab kini nga shooter nga sama nila ni Kuzma ug Cadwell-Pope. We’ll see. (jun.migallen22@gmail.com)