Binasi sa Exodo 16:2-4, 12-15; Salmo 78; Taga-Efesos 4:17, 20-24; Juan 6:24-35
Dili matugkad ang kalipay sa tibuok nasod nga Pilipinhon sa dihang nakadaog si Hidilyn Diaz sa unang “gold medal” sa Olympics. Hapit gyod maabot og usa ka gatos ka tuig ang atong paghulat. Nahuman ilado kaayo siya ug nagdugok ang mga premyo nga gitagana alang sa makabaton sa unang oro.
Daghan pod ang nakamatikod nga adunay duha ka medalya si Hidilyn. Ang usa mao ang medalya sa Olympics nga gikuptan niya sa iyang kamot. Ang ikaduha mao ang “miraculous medal” nga gisul-ob niya sa iyang liog. May nakasulti nako nga usa ka adlaw usa niya ma-isa ang kinatibuk-ang gibug-aton nga 224 kilos, si Hidilyn gisul-oban sa “miraculous medal” sa usa ka pari pinaagi sa Zoom.
Gidugokan si Hidilyn tungod sa iyang nabuhat. Sa laing bahin, midangop ang maong kampeyon, nga taga-Zamboanga, sa Ginuo. Gani ang iyang mga unang nabuhian nga pulong mitapos sa “Grabe si God. Grabe si God.”
Gidugokan si Jesus sa ebanghelyo ug mga tawo nga nangita kaniya. Misulti si Jesus, “Amen, sa pagkatinuod sultihan ko kamo, nagapangita kamo kanako dili tungod ka nakakita kamo og timaan apan tungod kay nakakaon kamo sa pan ug nangabusog kamo.” Praktikal diay ang gipangita nila kang Jesus kay nabusog man sila tungod sa pan ug isda nga iyang gipaambit sa mga tawo.
Apan nataligam-an nila ang punto nga buot ipadayag ni Jesus pinaagi sa iyang milagro. Nagpadayon si Jesus, “Paghago kamo dili alang sa kalan-on nga madunot, kondili alang sa kalan-on nga magapabilin sa kinabuhing dayon nga ihatag kaninyo sa Anak sa Tawo.” Si Jesus diay mao ang “timaan” nga nataligam-an sa mga tawo nga nangita lang og makapabusog kanila. Si Jesus diay ang tinuoray nga medalya.
May lain pang medalya diha sa libro sa Exodo. Gipanggutom ang mga Israelita ug nagbagulbol sila. Gidungog sila sa Dios ug nagpadala siya og pan nga ang ngalan “mana”. Sa tinud-anay lang ang maong pulong gipasabot “unsa (‘ma’) ni (‘na’)?” kay wala man ni nila mailhi. Tuboran sa gasa gyod ang Ginuo kon mangayo lang kita kaniya.
Apan dili lamang makaon nga pan ang gikinahanglan sa tawo. Ang pagbag-o sa hunahuna ug sa kinabuhi usa ka gasa nga gikan usab sa Dios. Mao kini gihisgotan sa sulat ngadto sa mga taga-Efesos. Kon tinuoray ang atong pagkatinun-an ni Cristo, matagamtaman nato ang maong kabag-ohan. Labaw pa kini sa bisan unsang medalya nga madaog sa natad sa pagpaugnat sa kusog.
Unsang klaseng medalya ang nadawit nimo sa Ginuo?