Nahitabo na ang gikahadlukan sa kadaghanan. Nabalik ang tibuok Cebu sa modified enhanced community quarantine (MECQ), ikaduha sa labing estriktong quarantine classification. Naputol ang dul-an 11 ka buwan nga modified general community quarantine (MGCQ) nga gi-enjoy sa mga Sugboanon.
Grabe man gud nga nakasaka ang mga kaso sa coronavirus disease 2019 (Covid-19) sa nakalabay nga mga semana. Naay mga adlaw nga nitaak sa kapin sa 300 ka bag-ong mga kaso sa usa lang ka adlaw sa Dakbayan sa Sugbo.
Kon ang usa pa ka punerarya ang basehan, mas daghan ang nangamatay sa Hulyo itandi sa pipila ka mga buwan nga nakalabay. Kulba, di ba?
Kinsa ba say di makulbaan nga nasayran na man nga duna nay 32 ka kompirmadong Delta variant nga na-detect dinhi sa Sugbo. Ang duha ani nangamatay, sumala sa Department of Health (DOH) central office.
Napugos ang local officials sa pagpatuman sa mga guideline sa Inter-Agency Task Force (IATF) ubos sa MECQ kay makalilisang na ang talan-awon sa mga tambalanan. Kinsa bay di mahadlok nga magtan-aw nga naglinya na ang mga ambulansya nga naghatod og mga pasyente nga gi-Covid. Kinsa bay di mabalaka nga magtan-aw nga kanunay nang nagbalikbalik og hatod ang mga kompaniya nga nanggama og oxygen ngadto sa mga ospital?
Mao baya ni ang mga talan-awon sa mga nasod nga unang naigo sa Delta variant. Ang India diin kini magagikan, diin dunay mga patay nga gipanglabay na lang sa kasapaan kay wa na maato og sunog.
Mao usab ni nga variant nga nagsige karon og atake sa Indonesia nga nahimo nang epicenter sa Covid sa Southeast Asia. Daghan na sab ang nangamatay sa Indonesia, apil na ang mga doktor.
Karong panahuna, angay kitang mahadlok, di maratol. Kon kita mahadok, magmabinantayon na man kita. Ang pagbantay ubanan sa pagpalig-on sa depensa. Tuman sa protocol ug pabakuna.