Mag-uuma nga nag-amok, nanglabay og bato sa mga miresponding pulis, napusilan patay alas 7:50 sa buntag sa Sabado, Hulyo 31, 2021 sa Sitio Gumamela, Barangay Daan Lungsod, lungsod sa Tuburan, Sugbo.
Si Danilo Talaugon Sampalad, 43, minyo, nagpuyo sa nahisgutang lugar, namatay pipila ka oras ang milabay sa pagkadangat sa tambalanan.
Si Police Staff Sgt. Mark Joseph Toring, imbestigador sa Tuburan Police Station nga nahinabi sa Superbalita Cebu, nagkanayon nga ang ilang kauban nga si Patrolman Johnny Iway Tejana maoy nakapusil kang Sampalad.
Matod ni Toring nga sila nakadawat og tawag gikan sa mga barangay tanod sa nahisgutang lugar nga si Sampalad nag-amok, nanghasi ug gusto nga kulatahon ang iyang asawa nga si Judith, 41.
Si Sampalad hubog nga nibalik sa ilang balay nga nagdalag kutsilyo ug gusto mosulod.
Si Sampalad gialarmahan na niadtong Biyernes human nangulata sa iyang asawa gumikan sa kahubog.
Apan pag-abot sa mga pulis niadtong Biyernes sa buntag, nidagan paingon sa bukid.
Gumikan niini, ang asawa ilang gitambagan nga mokuha og barangay protection order (BPO).
Si Sampalad nibalik sayo sa buntag sa Sabado nga hubog.
Nag-wild kay dili siya makasulod sa ilang balay tungod kay gihiktag pisi sa asawa ang pultahan.
Ang mga silingan nabalaka kay ang asawa naa sa sulod sa panimalay mao ilang gitawgan ang kapulisan.
Pag-abot sa mga pulis, gibato sila ni Sampalad, apan way naigo kanila ug sa mga tanod.
Gitambagan siya nga motahan, dili na mamato ug ibutang ang iyang gidala nga kutsilyo.
Wala gihapon mipatuo, subli na usab nga namato sa mga pulis hinungdan nga gipasalbahan.
Inay mahadlok, nangisog na hinuon og maayo ug nisinggit nga siya manabla, dili magpadakop nga buhi.
Nakasulod si Sampalad sa ilang balay ug nisinggit ang asawa sa kahadlok.
Si Tejana daling nakaduol sa balay, mi-am-am kang Sampalad aron ibutang ang kutisilyo.
Si Sampalad niabli sa pultahan ug niaksyon og eskrima, nagwara-wara sa kutsilyo nga sigeg hana pagdunggab kang Tejana.
“Magpatay ta ninyo, Sir. Dili ko padakop nga buhi,” singgit ni Sampalad.
Matod ni Toring nga si Sampalad kalit nga mibunot sa iyang giloklok nga armas, nition kang Tejana.
Si Tejana nga nakakita nga nag-ungaw siya sa kakuyaw napugos sa pagpusil kang Sampalad.
Naigo sa kilid sa lawas si Sampalad ug daling gidala sa tambalanan sa Tuburan, apan namatay pipila ka oras ang milabay.
Narekuber sa kapulisan ang caliber .38 revolver nga paltik, usa ka bala, usa ka kabhang, 19-inch nga kutsilyo, ug upat ka mga kabhang sa 9mm nga pistola.
Dugang ni Toring nga si Sampalad kanunay nga gialarma sa lugar kay managmal sa iyang asawa.