PASAKAAN og kasong paglapas sa Republic Act 9165 o Comprehensive Dangerous Drug Act of 2002 ang usa ka barangay kagawad ug iyang kauban human madakpi nga nagpayuhot og ilegal nga druga sa kapulisan ug Philippine Drug Enforcement Agency (PDEA) sa Bangsamoro Autonomous Region alas 4 sa hapon, Sabado, Hulyo 31, 2021.
Mga suspek naila nga sila Alinor Taurac ug Ibra Farhan, incumbent kagawad sa Barangay Guinaopan, Tamparan, Lanao del Sur.
Matud ni PDEA Maguindanao Provincial Officer Anthony Naive nga nagpahigayon sila og drug buy-bust operation uban ang kapulisan batok sa mga suspek sa Barangay Tambo.
Atol sa buy-bust operation, nakamatikod ang mga suspek nga mga pulis ug PDEA ang ilang katransaksiyon, hinungdan nga misakay dayon sila sa ilang sakyanan nga Toyota Revo (WHF 481) apan nakorner sa mga awtoridad.
Nakuha sa duha ka drug dealer ang tunga ka kilo nga shabu nga nagkantidad og P3.4 milyon. (Edgar E. Fuerzas)