GIPANGKUSTODIYA sa Toril Police Station ang 19 ka mga lalaki, sagad kanila mga mananagat, sa Toril, Davao City human nagyampungad sa computer ug nagpustahanay sa online sabong alas 4:30 sa hapon niadtong Biyernes, Hulyo 30, 2021, sa usa ka barangay sa Toril.
Sumala ni Police Major Michael Uyanguren, hepe sa Toril Police Station, nga nakadawat sila og impormasyon gikan sa nagpakabana nga dunay nagsugal og online sabong ug wa na sab napatuman ang social distancing.
Gilayong giadtoan sa mga pulis ang dapit ug naaktuhan ang mga nahisgutan nga nasugal.
Sa 19, walay bisan usa nga nakasibat ug gihimo dayon ang pagdokumento diin nakuha sa ilang posisyon ang usa ka set sa computer ug P1,510 nga pusta.
Giandam na ang tukmang kaso nga ipasaka sa mga nahisgutan samtang temporaryo silang gipangbalhog sa selda sa presinto otso.