USA ka pangtiklo nga right hook ang gigamit ni Filipino Eumir Marcial aron pagposte og makapaukyab nga 1st round knockout nga kadaugan batok kang Arman Darchinyan sa Armenia nga naghatod kaniya sa semi-final round sa men’s boxing middleweight division sa Tokyo Olympics kagahapon, Agusto 1, 2021 sa Kokugikan Arena sa Japan.
Sa kadaugan, si Marcial nakaseguro na og bronze medal nga puwede pa niyang isaka ngadto sa silver o gold.
Kontrolado ni Marcial ang kadiyot ra nga away pinaagi sa pagbuhi og body shots nga tatawng nagpatay-og kang Darchinyan, kinsa giiphan sa referee og standing eight count.
Human niini, nibuhi sunodsunod na sab nga kumbinasyon ang gilabay ni Marcial hangtod nga nakaantimano ang iyang right rook sa apapangig nga maoy brutal nga nagpatumba kang Darchinyan sa ika-2:11 minutos sa round ug ning higayuna, giundang na sa referee ang away.
Sa interbyu sa ESPN5 human sa away, nagkanayon si Marcial nga wala siya nagtuo nga mao kini ang mahitabo gumikan kay sayod siyang usa ka lig-ong boksidor si Darchinyan ug wala pa siya sukad nakakita nga nalukapa kini ibabaw sa ring.
Si Darchinyan nagsige og reklamo sa referee nga gisukmag siya ni Marcial sa likod nga bahin sa iyang ulo ug alang kaniya, angay kining tawagan og foul.
Apan makita sa video replay nga limpyong mga kumo ang nakaigo kang Darchinyan lakip na niini ang right hook sa lumad nga taga Zamboanga City nga maoy naghuman og sayo sa away.
Sa semi-finals, ikaharong ni Marcial si Oleksandr Khyzhniak sa Ukraine karong Agusto 5, 2021.
Ning puntoha, ang Pilipinas nakaseguro na og tulo ka mga medalya sa matag upat ka mga tuig nga kompetisyon. Ang unang naghatag og makasaysayong mga medalya sa Pilipinas mao sila si weightlifter Hidilyn Diaz (gold) ug boxer Nesthy Petecio (silver o gold). (ESL)