NIPADANGAT dayon og makapadasig nga mensahe si Filipino boxing legend Manny Pacquiao ngadto kang Eumir Marcial human sa makapaukyab nga 1st round knockout nga kadaugan sa lumad nga taga Zamboanga City batok kang Arman Darchinyan sa Armenia kagahapon, Agusto 1, 2021 sa quarter-final sa men’s boxing middleweight division sa Tokyo Olympics.
Si Marcial nakasulod sa semis ug nakaseguro na og bronze medal nga maoy ikatulo sa Pilipinas sa kompetisyon sunod nila ni weightlifter Hidilyn Diaz (gold) ug lady boxer Nesthy Petecio (silver o gold).
Pinaagi sa iyang Twitter account, ang Pambansang Kamao ng Pilipinas midasig kang Marcial nga padayon sa paggukod sa pangandoy niining makalangkat og gold medal sa matag upat ka mga tuig nga kompetisyon.
“Let’s go Eumir Marcial!” tweet ni Pacquiao, kinsa napatik sa kasaysayan sa boksing isip bugtong 8-division world champion.
Sa miaging tuig, si Marcial nagpasakop sa MP Promotions nga gipanag-iya ni Pacquiao sa iyang pagsaka sa professional rank.
Gipasabot ni Marcial nga bisan nisaka na siya sa professional rank, dili niya talikdan ang iyang tahas sa Tokyo Olympics.
Sa laing bahin, ang Malacañang nagpadangat sab dayon sa ilang pahalipay nga mensahe ngado kang Marcial.
“We congratulate Eumir Marcial for securing the Philippines’ third Olympic medal when he defeated his opponent in the men’s boxing middleweight quarterfinals today, August 1, 2021, at the Tokyo Olympics,” pamahayag ni presidential spokesperson Harry Roque nga napatik sa www.gmanews.tv.
“Let us continue supporting and cheering Eumir and other Filipino athletes in their quest for gold. Mabuhay ka, Eumir. Go for gold!” (ESL)