Kahiusahan sa San Fernando
NIPASALIG og kahiusahan ug pagtinabangay ang mga namuhonan ug namatigayon sa San Fernando uban sa liderato sa lungsod, ilabi na sa paghaw-as sa krisis dala sa pandemiyang coronavirus ug kauswagan isip sentro sa ekonomiya sa habagatang Sugbo.
Nisaad sila sa usa ka seremonyal nga pag-amuma sa “Forward as One: An Emblematic Call for Unity,” pinaagi sa pagbubo og tubig sa mahuloganong tanom, nga mitugbaw sa 2021 Investors Forum sa lungsod ning bag-o pa lang sa Bai Hotel sa Mandaue City.
Miapil ang Taiheiyo Cement Philippines, Inc. (TCPI) ug Solid Earth Development Corp. (SEDC) sa seremonyas nga gipasingunhan ni Mayor Lakambini G. Reluya ug Bise Mayor Ricci Regen Reluya uban sa mga nagdumala sa mga departamento sa lungsod.
Nitugyan alang sa TCPI sila si Tatsushi Sasao, senior vice president for operations ug tagduma sa planta, ug Takuya Nose, luyoluyong pangulo alang sa administrasyon, ug si Motohiro Tonsho alang sa SEDC isip senior technical adviser ug direckor.
Miapil sab si Atty. Dennis Tenefrancia, pangulo sa SEDC, nga nanumpa sab sa iyang liderato sa San Fernando Chamber of Commerce and Industry gikan kang Engr. Alan Jesus Salmero.
Gidawat niya ang galyon, symbolo sa pagpamatigayon ug ekonomikanhong panagdugtong sa mga Español ug mga Pilipino sa 1800 nga mga katuigan, gikan ni Salmero nga nagduma sa Economic and Investment Promotion Office sa lungsod.
NAGMATNGON
Uban sa temang “Forward as ONE to a Shining San Fernando,” giangkon ni Mayor Reluya sa iyang pagpamulong ang mga babag ug kalampusan sa iyang administrasyon, ug mga umaabot nga mga panimpalad nga buot niyang mapatuman.
Gihimug-atan niya ang iyang 10-point-agenda nga mipahiluna sa tono sa iyang maabtikon, bag-o ug madugtongong liderato nga natanyag niya ug sa iyang anak sa San Fernando nga napukaw gikan sa pagkatulog uban sa pag-abag sa mga magpapatigayon nga nakakita sa kahimuan niini alang sa ekonomikanhong kaugmaran.
Sa iyang mensahe sa pag-abi-abi, gipasalig ni Vice Mayor Ricci nga “ilhon ang mga magpapatigayon nga namuhunan sa San Fernando tungod sa ilang pagsalig ug pagtuo.”
Gitak-op ni municipal administrator Neil L. Papas ang kalihukan sa pagpunting sa panginahanglanon sa mga patigayon nga magmatngon sa katilingban.
“Makatabang ang pagmatngon sa malungtarong relasyon sa katilingban,” matod ni Papas.
“Naglaum ang mga nahintungdan sa mga kompanya dili lang sa pagtanyag og daghang maayong mga produkto ug serbisyo, apan aron usab matabangan ang komunidad asa sila namatigayon,” siya midugang.
Tigpahigayon ang TCPI ug SEDC og mga kaayuhan sa lungsod pinaagi sa ilang masigka-Social Development Management Programs (SDMP) ug Environmental Protection and Enhancement Program (EPEP). (PR)