PADAYON ang pagpaspas sa Mandaue Vaccine board sa pagpamakuna sa dakbayan labi na sa presensya sa Delta variant coronavirus disease 2019 (Covid-19) sa Sugbo.
Ang Mandaue dunay tulo ka mga kaso.
Matod ni Ernie Manatad, pangu sa vaccine board ug presidente sa Association of Barangay Council (ABC), nga ipadayon nila ang paghingusog sa ilang pagpamakuna batok sa Covid-19, diin nanglapas na sila sa ilang target ang mabakunahan matag adlaw.
Gani, ang dakbayan sa Mandaue kanunay nga dunay labing taas og porsyento sa nabakunahan sa tibuok sa Metro Cebu.
Sa datos sa Project Balik Buhay niadtong Hulyo 30, 2021, ang Dakbayan sa Mandaue nakabakuna og kinatibuk-an 151,757 doses.
Ang 103,232 doses niini alang sa first dose samtang 48,525 alang sa second dose.
Gipakita sab sa datos sa PBB nga ang Dakbayan sa Mandaue nakabakuna na og 34.91 porsyento alang sa first dose ug 16.41 porsyento alang sa second dose.
Kini nagpasabot nga two-third nalang sa populasyon sa dakbayan sa Mandaue ang kinahanglan bakunahan aron makab-ot ang herd immunity.
Gani, aduna nay 302,712 ka mga indibidwal ang narehistro sa ilang master list.
Kalabot sa paglusad sa pagpamakuna sa mga senior citizen, gisultihan ni Manatad ang mga opisyal sa barangay nga buhaton ang tanan nilang mahimo labi na sa ilang information drive aron makumbinser ang mga tigulang nga mapahimuslan ang bakuna sa Johnson & Johnson nga aduna lay usa ka dose.
Matod niya nga gitugotan ang mga senior citizen nga mag walk-in sa mga vaccination site ug aduna ra sab silay gibutang nga fast lane alang kanila.
Sa laing bahin, sa Agusto 5, matod ni Manatad, magsugod na sila sa pagpadagan sa mobile vaccination clinic nga adunay duha ka vaccination team.
Una kining ilusad ngadto sa 65 housing site sa Barangay Paknaan, Dakbayan sa Mandaue.
Ang makapahimulos niini ang mga senior citizen, person with comorbidity ug mga pobre. (KFD)