GINANG nga giingong nasakpan nga dunay daghang tsikinini sa liog gipusil patay sa iyang kapuyo alas 9 sa buntag sa Dominggo, Agusto 1 sa Sitio Centro, Barangay Buanoy, lungsod sa Balamban, Sugbo.
Si Florie Mae Cañete, 45, taga Sitio Camancilis, Barangay Cabagdalan, sa mao nga lungsod patay nang nidangat sa tambalanan sa lungsod human nakaangkog samad pinusilan sa ulo.
Naa pa sa kritikal nga kahimtang ang iyang kapuyo nga si Jether Lerado, 45, forklift operator sa SPEQSE Construction nga nagbase sa Balamban human nagpusil sa kaugalingon pinaagi sa pag-um-om sa sumbohan sa armas.
Si Police Corporal Ruskm Salado sa Balamban Police Station nagkanayon nga selos ang motibo sa kremin.
Nibutyag si Salado nga ang anak sa manag live-in partner nga si Mathin, 14, nibutyag nga nakamata siya alas 8 sa buntag.
Nagkalalis ang iyang amahan ug inahan sulod sa ilang kwarto.
Dayon nigawas si Jether nga naghilak ug nakig-estorya sa igsuon ni Florie Mae nga si Rauliza nga ipaatiman ang ilang 5-anyos nga anak.
Wala magdugay, nibalik si Jether sa pagsulod sa ilang lawak.
“Butu-buto dayon. Gisusi sa iyang mga anak ug silingan. Nagbad-ay na ang duha, nagkadugo,” dugang ni Salado.
Ang suspek kinsa nakasulti pa niangkon nga iyang nahimo ang krimen tungod sa selos.
Nasakpan niya nga dunay daghang tsikinini si Florie Mae sa liog.
Human niyag pusil sa iyang kapuyo, iyang gium-om ang armas ug nagpusil sab sa kaugalingon.
Si Bobilles nagkanayon nga wala makagawas ang bala sa armas ug matod sa doktor, niungot sa likod sa ulo ni Jether.
Dali dayon siyang gibalhin sa Vicente Sotto Memorial Medical Center (VSMMC).
SELOS
Si Police Executive Master Sgt. Benedicto Bobilles, imbestigador sa Balamban Police Station nga nahinabi sa Superbalita Cebu, nagkanayon nga selos ang motibo sa kremin.
Si Jether nasuko sa iyang kapuyo dihang nilakaw kini niadtong Hulyo 28 sa buntag nga nananghid nga mag follow-up sa iyang application papers sa pagpangaplay og trabaho sa abroad.
Apan nipauli si Florie Mae niana nang pagkasunod buntag sa Hulyo 29 ug giingong duna nay mga tsikinini sa liog.
“Suko kaayo ang suspek kay nakit-an man niya nga dunay daghang kiss mark sa liog ang (biktima). Mao nag-away sila kay daan nang nagduda,” dugang ni Bobilles.
Ang anak ug kahigalaan nitug-an sa kapulisan nga kanunay mag-away ang duha tungod sa selos.
Si Jether giingong pwerting selosoha hinungdan nga kanunay silang mag-away ni Florie Mae.
Giingong human naestambay og dugay si Florie Mae, ni-apply kini sa gawas sa nasod og trabaho.
Narekuber sa kapulisan ang .357 caliber revolver nga dunay duha ka mga kabhang ingon man duha ka mga bala.