MAPASALAMATON kita sa mga lokal nga opisyal nga ningbarog sa pagbalanse sa mando sa nasyonal nga Inter-Agency Task Force (IATF) ning pagpaubos sa tri-cities sa Sugbo sa modified enhanced community quarantine (MECQ) sugod kagahapon, Agusto 1, hangtod sa 15 ning buwana, gikan sa modified general community quarantine (MGCQ).
Ang Probinsya sa Sugbo, nahukman sa IATF, nga ubos sa general community quarantine (GCQ).
Supak unta sila si Gobernador Garcia ug mga chief executive sa lockdown aron di mahunong ang dagan sa pamatigayon ug publikong transportasyon kay mahimo ra mang ipatuman nga hugot ang mga health protocol, lakip sa mas sayong curfew.
Sila si Acting Mayor Michael Rama sa dakbayan sa Sugbo, Mayor Junard Chan sa Lapu-Lapu, Mayor Jonas Cortes sa Mandue nagkahiusa sa pag-apelar sa IATF nga walay lockdown. Tugotan nga mopadayon ang kalihokan ubos sa MGCQ status.
Si Rama niingon nga ipadayon ang vaccination rollout, pamatigayon ug transportasyon uban sa pagpadayag nga dili pwede nga mamatay ang ekonomiya nga mas labaw pa unya ang epekto sa Covid-19 kon himuon ang laing lockdown.
Si Rama, atol sa tigom niadtong Sabado, Hulyo 31, nakapangutana kon andam ba ang IATF nga mohatag og salapi sa pagtuyok sa ekonomiya human sa lockdown? Mao kini hinungdan sa pagpasira sa daghang kompaniya ug pagpanaktak og kawani o retrenchment.
Insakto si Rama. Sa laing lockdown, dugang kompaniya mosira ug mapun-an ang walay trabaho. Matod pa, masumpo tuod ang virus apan ang katawhan mamatay sa kagutom. Posibling motumaw ang kagubot.
Kabalak-an. Makahadlok ang pag-abot sa Delta variant. Apan dili kini igong rason nga patyon usab ang nagmalambuong ekonomiya. Suportahan nato ang atong mga opisyal sa ilang baroganan. Magpakabana sa kahimsog sa panglawas.